LAVROV DHE BLINKEN UDHËTOJNË NË SHKUP, NUK DO TË KETË TAKIM MIDIS TYRE

Ministri i Punëve të Jashtme të Federatës Ruse, Sergej Lavrov, do të marrë pjesë forumin e Këshillit Ministror të OSBE-së në Shkup pasi Bullgaria vendosi t’i heqë përkohësisht sanksionet ndaj Moskës që ndalojnë çdo lloj fluturimi në hapësirën e saj ajrore.

“Në bazë të kërkesës së marrë nga Ministria e Punëve të Jashtme të Republikës së Maqedonisë së Veriut, në cilësinë e kryesuesit të OSBE-së për vitin 2023 dhe organizator i takimit të 30-të të Këshillit Ministror të OSBE-së në Shkup, më 29 nëntor – 1 dhjetor 2023, sigurimi i lejes për fluturimin e delegacioneve për të marrë pjesë në Këshillin e ardhshëm të Ministrave të OSBE-së, Ministria e Punëve të Jashtme të Republikës së Bullgarisë dha leje për realizimin e një fluturimi të Njësisë Speciale të Aviacionit “Rusia” përmes hapësirës ajrore të Republikës së Bullgarisë për të kryer një fluturim për të transportuar një delegacion për të marrë pjesë në forumin ndërkombëtar”, tha MPJ bullgare.

Në kumtesë thuhet se autorizimi diplomatik i fluturimit është i përkohshëm dhe është i vlefshëm 3 orë para dhe 72 orë pas datës dhe orës së caktuar të fluturimit.

“Leja e dhënë Ministrit të Punëve të Jashtme të Federatës Ruse, Sergej Lavrov, i është dhënë për të marrë pjesë në mbledhjen e Këshillit të Ministrave të OSBE-së në Shkup dhe është përfshirë në përjashtimet nga zbatimi i regjimit të sanksioneve të BE-së ndaj tij”, thotë MPJ bullgare.

Nga ana tjetër, Ndihmës Sekretari i Shtetit për Evropë dhe Euroazi, James O’Brien konfirmoi se sekretari amerikan i shtetit Anthony Blinken do të përfaqësojë Shtetet e Bashkuara në takimin e OSBE-së në Shkup.
Ministri i Punëve të Jashtme, Bujar Osmani, javën e kaluar njoftoi se Blinken do të marrë pjesë në darkën joformale të Këshillit Ministror të OSBE-së në Shkup, e cila do të mbahet më 29 nëntor në një hotel të Shkupit. Nga MPJ në Shkup thonë se nuk do të ketë takim midis Blinkenit dhe Lavrovit, ndërkohë që pritet që i tërë samiti të përshkohet nga tensionet midis përfaqësuesve të Perëndimit dhe Rusisë.

Për shkak të kundërshtimit të Rusisë dhe Bjellorusisë, disa përpjekje për të arritur një konsensus që kandidatja Estonia të kryesojë OSBE-në në vitin 2024, rezultuan të pasuksesshme. Në momentin e fundit është arritur marrëveshja që kryesimin ta marrë Malta, gjë që është vlerësuar si një fitore për Rusinë. Në dhjetor skadon mandati i katër drejtuesve ekzekutivë në Organizatë dhe një nga çështjet më të rëndësishme për t’u zgjidhur është buxheti që nuk është miratuar që nga viti 2021, si dhe më shumë operacione aktuale në terren të organizatës. /The Geopost/