Kriminelë kibernetikë rusë dyshohet se qëndrojnë pas vjedhjeve të kriptovalutave nga përdoruesit e LastPass

Kriminelë kibernetikë të lidhur me Rusinë dyshohet se qëndrojnë pas një serie vjedhjesh të kriptovalutave nga përdoruesit e platformës LastPass, sipas një analize të detajuar të blockchain-it të publikuar nga kompania analitike TRM Labs.

Sipas raportit, infrastruktura kibernetike kriminale ruse është përdorur vazhdimisht për pastrimin e kriptoaseteve të vjedhura.

TRM Labs thekson se të gjitha provat e mbledhura janë në përputhje me përfshirjen e akterëve kërcënues rusë, duke përfshirë ndërveprime të përsëritura me infrastrukturë të lidhur me Rusinë.

Analiza tregon gjithashtu se kuletat digjitale që kanë ndërvepruar si para ashtu edhe pas procesit të pastrimit të parave kanë shfaqur lidhje operative me Rusinë, raporton CyberNews.

Sipas analistëve, mbi 28 milionë dollarë në kriptovaluta janë vjedhur, konvertuar në Bitcoin dhe pastruar përmes kuletës digjitale Wasabi në fund të vitit 2024 dhe në fillim të vitit 2025. Ndërkohë, edhe 7 milionë dollarë të tjerë janë gjurmuar në shtator të vitit 2025. Në të dyja rastet, shuma totale prej rreth 35 milionë dollarësh vlerësohet të përfaqësojë vetëm një pjesë të humbjeve të përgjithshme.

Raporti zbulon se fondet e vjedhura janë drejtuar përmes shërbimit CryptoMixer, i cili tashmë është mbyllur, dhe më pas janë tërhequr përmes shkëmbimit rus të sanksionuar Cryptex gjatë vitit 2024.

Shuma prej 7 milionë dollarësh është dërguar fillimisht përmes Wasabi, përpara se të transferohej te Audi6, një tjetër kuletë digjitale ruse e lidhur me aktivitete kriminale.

Autoritetet dhe kompanitë e sigurisë kibernetike vazhdojnë hetimet për të identifikuar përgjegjësit dhe për të parandaluar raste të ngjashme në të ardhmen./TheGeoPost.