Arnaud Gouillon – ekstremisti francez që u bë ‘serb i vërtetë’ për interesat e Vuçiqit dhe Rusisë

“Edhe pse nuk kam as një pikë gjak serb në vete, prapëseprapë Serbia rrjedh në venat e mia”, është fjalia që Arnaud Gouillon, qytetar serb me origjinë franceze dhe funksionar i regjimit të Aleksandar Vuçiqit, e mban në foton e profilit në Facebook, ku pozon pranë përmendores së udhëheqësit të Kryengritjes së Parë Serbe, ndërsa në sfond shihet Tempulli i Shën Savës.

Gouillon është funksionar i cituar shpesh në tabloidët pro-regjimit në Serbi, sepse sulmon me kënaqësi Perëndimin dhe mbron serbët në mënyrën që e dëshiron regjimi aktual.

Që në videon e parë në profilin e tij në rrjetin social Facebook, mund të shihet Gouillon duke iu drejtuar publikut në Shtëpinë Ruse në Beograd, në gjuhën ruse. Dhe kështu sikur u jep të drejtë pretendimeve që pajtohen se ky ekstremist francez në fakt është njeri rus në Serbi.

Arnaud ushtron funksionin e drejtorit të Zyrës për Diplomaci Publike dhe Kulturore të Serbisë, detyra e së cilës është të merret me diasporën serbe. Ka lindur në Grenoble të Francës dhe siç thotë vetë, për Serbinë e ka dëgjuar për herë të parë nga gjyshi që i tregonte për “miqësinë e dy popujve, luftën e përbashkët në Frontin e Selanikut” dhe “jetimët serbë që i pritën francezët”.

Këto rrëfime, thotë, i kanë mbetur të gdhendura në kujtesë, ndërsa “lidhja me një popull” është “thelluar sidomos gjatë agresionit të NATO-s ndaj RF Jugosllavisë”, të cilin e mban mend si trembëdhjetëvjeçar, si dhe rrëfimet në familje për padrejtësinë që u është bërë serbëve dhe në të cilën ka marrë pjesë edhe Franca.

Gouillon më 2004 themeloi organizatë humanitare dhe mblidhte e dërgonte ndihma për serbët në Kosovë. Vazhdon të bashkëpunoj ngushtë me Kishën Ortodokse Serbe në Kosovë, ndërsa në 2015 i është dhënë shtetësia serbe. Disa medie opozitare serbe, e lidhin Arnaudin me lëvizjen ekstreme të djathtë franceze “Bloc Identitaire”. Ai pranon se ka qenë anëtar i lëvizjes, por pretendon se kjo ka zgjatur vetëm gjysmë viti, edhe pse disa media në Serbi më vonë shkruanin se ka qenë shumë më gjatë me ta.

Është autor dhe bashkautor i katër librave për Kosovën dhe fitues i disa dekoratave të larta shtetërore serbe. Është i martuar me një serbe me të cilën ka tre fëmijë. Flet serbisht rrjedhshëm, dhe se origjina e tij nuk është nga Ballkani mund të vërehet vetëm nga theksi.

Christian Castagna, këshilltar politik i specializuar për vendet ish-socialiste, me fokus të veçantë në vendet e ish-Jugosllavisë, thotë se Gouillonin, para së gjithash, familja e tij dhe rrethi politik e kanë shtyrë që marrëdhëniet franko-serbe t’i shikojë ekskluzivisht përmes prizmit të “Frontit Lindor” dhe asaj që e konsideron tradhti franceze dhe detyrim kur në pranverën e 1999-së ka marrë pjesë në operacionin e NATO-s kundër Serbisë.

Bojana Selakoviq, koordinatore e Konventës Kombëtare për BE-në, platformë e shoqërisë civile që përfaqëson interesat e qytetarëve të Serbisë në të gjitha fazat e procesit të integrimeve evropiane thotë se nuk është plotësisht e sigurt lidhur me ardhjen e Gouillonit në Serbi dhe angazhimin e tij, por se bazuar në atë që thotë dhe atë që bën mund të thuhet se ai ka funksion të dyfishtë: nga njëra anë “përfaqëson urë drejt disa akterëve evropianë me orientim të djathtë, sidomos në Francë”, ndërsa nga ana tjetër shërben për nevojat e brendshme të regjimit të Vuçiqit dhe iu drejtohet opinionit publik si dikush që vjen nga Evropa, por është miqësor ndaj Serbisë dhe interesave e qëllimeve kombëtare të shpallura të Serbisë.

Naim Leo Beshiri, drejtor i Institutit për Çështje Evropiane, lidhjen e Gouillonit me “njerëz të orientuar qartë djathtas nëpër Evropë, duke përfshirë shërbimet e sigurisë së Federatës ruse”.

“Me shenjë të FSB-së ruse dhe shërbimeve të sigurisë së Serbisë mund të jenë operative para së gjithash kur është fjala për Kosovën, që të mobilizojnë forcat politike në Kosovë dhe të realizojnë dëshirat e Vučićit”, thekson Beshiri.

Edhe Miodrag Kapor nga organizata “Monitor Odgovornosti”, shoqatë që kryesisht është e fokusuar në studimin e ndikimit rus në Serbi, thotë se Gouillon “është një nga shembujt e jashtëzakonshëm të njerëzve që Rusia i ka shfrytëzuar për të radikalizuar Serbinë dhe për ta larguar nga Evropa dhe integrimet evropiane”./Slobodnadalmacija/