Trajkoviq: Barrikadat në veri u ngritën nga grupi mafioz i Radoiçiqit, Kisha Ortodokse Serbe është vegla e pushtetit destabilizues të Vuçiqit

Presidentja e Lëvizjes Evropiane të Serbëve nga Kosova dhe këshilltarja në Qeverinë e Kosovës Rada Trajkoviç tha se Kisha Ortodokse Serbe është “leva kryesore e pushtetit shkatërrues” të presidentit serb Aleksandar Vuçiq dhe vlerësoi se ai kurrë nuk do të vendosë sanksione ndaj Rusisë.

Rada Trajkoviq tha në një intervistë për portalin e Vojvodinës Autonomija se Vuçiq, në vend të Perëndimit, e ktheu Serbinë drejt Rusisë, kështu që sot është më larg nga BE sesa ka qenë ndonjëherë.

Leva kryesore e fuqisë shkatërruese të Vuçiqit është, për fat të keq, Kisha Ortodokse Serbe, e cila, së bashku me Kishën Ruse, po destabilizon me sukses rajonin.

Ajo akuzoi patriarkun Porfirije të SPC për përmbushjen e urdhërave politike të Aleksandar Vuçiç.

Rada Trajkoviq ka thënë se barrikadat në veri të Kosovës së fundmi janë ngritur nga “grupi mafioz i Milan Radojiçiqit”.

Gazetari Tim Judah ka shkruar së fundmi për këtë dhe ka pohuar se më shumë se 600 të rinj nga veriu i Kosovës janë dërguar në Rashkë, ku janë trajnuar për t’i rezistuar Shqiptarëve. Në këtë kuptim, historia për grupin Wagner që pretendohet se është bërë atje është më shumë një hile e përdorur nga Serbët, por edhe propagandë, qëllimi i së cilës është të lidh më tej Serbët me Rusët në kuptimin politik. Kam frikë se Vuçiq, i cili është një eksponent kryesor i politikës ruse në Ballkan, është pjesë e asaj propagande – tha ajo.

Sipas saj, nëse Beogradi nuk deklarohet përfundimisht për Rusinë, Kosova do të marrë gjithnjë e më shumë mbështetje nga NATO, do të forcohet dhe do të bëhen investime në potencialin ushtarak të Kosovës..

Trajkoviq tha se Vuçiq nuk do të vendosë kurrë sanksione ndaj Rusisë.

Ajo pyeti se pse nuk dëgjohet zëri i fortë i partive opozitare kundër politikës së tillë të Vuçiqit dhe vlerësoi se një zë të tillë do ta përkrahnin disa partnerë në rajon, veçanërisht ata të cilëve kufijtë kombëtarë janë të kërcënuar nga veprimet e regjimit të Vuçiqit.

Në ato shoqëri, Serbia mund të gjente shumë miq dhe bashkëpunëtorë – si në Bosnje dhe Hercegovinë, ashtu edhe në Mal të Zi, një vend që, siç dihet, gjithmonë u ka ofruar strehë liderëve të opozitës demokratike në Serbi. Nganjëherë pyes veten nëse kjo lloj marrëveshjeje anti-perëndimore dhe kundër fqinjësisë mes qeverisë dhe opozitës paraqet një strategji “tani ose kurrë”, pra një përpjekje për të arritur qëllimet e mëdha shtetërore të Serbisë – tha Rada Trajkoviq.

Ajo akuzoi Aleksandar Vuçiqin se është “një njeri që lufton vetëm për veten e tij” dhe se nuk kujdeset për Serbinë./Pobjeda/