Rusia përdor diplomatët nga vendet afrikane për spiunazh,mbështetet te vendet mike si Serbia e Hungaria

Rusia po ndryshon aktivitetet e saj të spiunazhit në Evropë pas luftës së saj kundër Ukrainës. Siç raporton radiotelevizioni gjerman “Ard”, ristrukturimi i spiunazhit u bë i domosdoshëm pas dëbimit nga viti 2022 të rreth 500 spiunëve të Moskës nga vende të ndryshme evropiane ku ishin akredituar si diplomatë.

Tani, për të marrë informacion, shërbimet sekrete ruse po mbështeten në “teknologjitë më moderne” dhe “agjentët e udhëtimit”.

Sipas “Ard” dhe gazetës “Sueddeutsche Zeitung”, në Gjermani janë rreth 20 spiunë rusë të akredituar si diplomatë, nën vëzhgimin e Zyrës Federale për Mbrojtjen e Kushtetutës (bfv), agjencia e brendshme gjermane e inteligjencës.
Stafi i kufizuar dhe mbikëqyrja e kundërzbulimit do ta bënte të vështirë për Moskën kryerjen e operacioneve komplekse.

Midis prillit 2022 dhe 2023, Gjermania dëboi 70 diplomatë rusë të dyshuar për spiunazh. Për të zëvendësuar agjentët e dëbuar nga Evropa, Rusia do të përdorte tani spiunët që shërbejnë tashmë në ambasadat e saj në Afrikë. Për më tepër, sipas inteligjencës holandeze, Moska depërton në kontinentin evropian me agjentë me biografi të rreme, të cilët paraqiten si sipërmarrës. Në të njëjtën kohë, Rusia mbështetet në “vendet me qeveri mike si Hungaria dhe Serbia”.

Të dyshuara për bashkëpunim me krimin e organizuar, shërbimet sekrete ruse janë aktive edhe në Turqi, Emiratet e Bashkuara Arabe dhe Afrikën e Veriut. Për BFV, që kur pushtoi Ukrainën, Rusia ka vendosur spiunët e saj me një “ritëm më të lartë”. Kjo do të thotë se operacionet janë bërë “më pak skrupuloze”, ndërsa gjasat për zbulimin e agjentëve rriten.

Në këtë kontekst, konsullata e përgjithshme ruse në Bon ka rëndësi. Me ambasadën ruse në Berlin, këto janë të vetmet përfaqësi të Moskës që kanë mbetur në territorin gjerman, pas mbylljes së konsullatave të përgjithshme në Mynih, Frankfurt am Main, Leipzig dhe Hamburg.

Ish-kryeqyteti i Gjermanisë Perëndimore është, në fakt, me interes të veçantë për Rusinë, pasi aty janë të vendosura të dyja zyrat e Ministrisë gjermane të Mbrojtjes dhe disa organizata ndërkombëtare.
Për më tepër, nga Boni “agjentët udhëtues” rusë mund të udhëtojnë “shpejt” në Francë, në Belgjikë ku janë të vendosura NATO dhe BE, në Holandë dhe në Luksemburg.

Në të njëjtën kohë, në Austri, Rusia mund të përfitojë nga trajtimi relativisht i butë që qeveria e Vjenës ka rezervuar për agjentët e saj. Deri më tani, vetëm tetë spiunë rusë janë dëbuar nga Austria, krahasuar me një total prej 100 të akredituar si personel diplomatik./The Geopost/