SHBA ndryshon fokusin strategjik, Whitaker: Evropa duhet të bëjë më shumë për sigurinë e saj

Ambasadori i Shteteve të Bashkuara në NATO, Matthew Whitaker, ka renditur prioritetet strategjike të Washingtonit në politikën e sigurisë, duke e vendosur Evropën në vendin e katërt.

Whitaker tha se prioriteti i parë i Shteteve të Bashkuara është mbrojtja e territorit amerikan, ndërsa në vendin e dytë renditet hemisfera perëndimore.

Sipas tij, prioriteti i tretë strategjik është rajoni i Paqësorit, ndërsa Evropa vjen në vendin e katërt.

Megjithatë, ambasadori amerikan në NATO theksoi se kjo renditje nuk duhet të interpretohet si tërheqje apo braktisje e Evropës nga Shtetet e Bashkuara.

“Numri katër është Evropa. Kjo nuk do të thotë se po e braktisim Evropën. Thjesht po u kërkojmë evropianëve të marrin më shumë përgjegjësi dhe të barazojnë kontributin e tyre”, tha Whitaker.

Deklaratat e tij vijnë në një kohë kur Shtetet e Bashkuara po u bëjnë presion aleatëve evropianë të NATO-s që të rrisin kapacitetet dhe shpenzimet e tyre të mbrojtjes dhe të marrin përsipër një pjesë më të madhe të përgjegjësisë për sigurinë e kontinentit.

Qasja e Washingtonit nënkupton një kërkesë për një rol më të madh të Evropës në mbrojtjen e vet, ndërsa Shtetet e Bashkuara vazhdojnë të përballen me prioritete të tjera strategjike, veçanërisht në hemisferën perëndimore dhe në rajonin e Indo-Paqësorit.

The GeoPost