Gjermania nis prodhimin masiv të dronëve për Ukrainën, disa do të kenë rreze deri në 1,500 kilometra

Gjermania ka nisur prodhimin në seri të rreth 5,000 dronëve sulmues me rreze të gjatë veprimi, të destinuar për Ukrainën, në kuadër të një porosie të qeverisë gjermane me vlerë rreth 300 milionë euro.

Prodhimi po realizohet përmes një sipërmarrjeje të përbashkët mes kompanisë gjermano-amerikane Auterion dhe kompanisë ukrainase Airlogix, ndërsa kapacitetet e prodhimit po zgjerohen pranë Mynihut dhe në pjesën lindore të Gjermanisë.

Sipas planit, porosia pritet të përfundojë deri në mesin e vitit 2027.

Një prej modeleve të reja të dronëve do të jetë në gjendje të godasë objektiva në distanca deri në 1,500 kilometra, duke i dhënë Ukrainës një kapacitet të ri për sulme në thellësi të territorit.

Dronët do të pajisen gjithashtu me sisteme të inteligjencës artificiale, të projektuara për t’i ndihmuar në përballimin e luftës elektronike ruse. Teknologjia synon të rrisë aftësinë e mjeteve pa pilot për të operuar edhe në kushte ku Rusia përdor sisteme për bllokimin ose ndërhyrjen në komunikimet dhe navigimin e tyre.

Prodhimi në Gjermani dhe bashkëpunimi me industrinë ukrainase janë pjesë e përpjekjeve për të rritur kapacitetet evropiane të prodhimit të dronëve dhe për të forcuar mbështetjen ushtarake për Ukrainën.

Në prill, kancelari gjerman Friedrich Merz dhe presidenti ukrainas Volodymyr Zelensky diskutuan për një paketë të re të mbështetjes mbrojtëse gjatë takimit të tyre.

Prodhimi i dronëve me rreze të gjatë veprimi vjen në një periudhë kur dronët janë shndërruar në një prej komponentëve kryesorë të luftës në Ukrainë, si për sulme ndaj objektivave në vijën e frontit, ashtu edhe për goditje në distanca të mëdha.

The GeoPost