Zelensky: Lufta për Donbasin ka filluar

Presidenti ukrainas Volodymyr Zelensky tha se një “pjesë e madhe e ushtrisë ruse” tani është e fokusuar në ofensivën e Donbasit.

Zelensky, tha se Rusia ka nisur një sulm për të kapur rajonin lindor të Donbasit.

Moska bombardoi qytetet me raketa dhe zjarr artilerie të hënën dhe në një fjalim përmes video-lidhjes, Zelensky tha se beteja “për Donbasin ka filluar”.

Zyrtari më i lartë i sigurisë i Ukrainës, Oleksiy Danilov, tha se Rusia u përpoq të thyente linjat e frontit ukrainas në rajon.

Ofensiva ka qenë e pritur prej kohësh pasi Rusia nuk arriti të pushtonte Kievin.

Rusia fillimisht dukej se donte të pushtonte qytetet kryesore të Ukrainës dhe të rrëzonte qeverinë.

Por pasi u përball me rezistencë të ashpër, zyrtarët rusë të mbrojtjes thanë se objektivat e saj kryesore në “fazën e parë të operacionit” ishin ” përmbushur përgjithësisht” dhe forcat e saj u zhvendosën nga zonat përreth kryeqytetit.

Presidenti rus Vladmir Putin e ka portretizuar pushtimin si një përpjekje për të çmilitarizuar dhe “denazifikuar” Ukrainën, diçka që Ukraina dhe aleatët e saj e hedhin poshtë si një hile për një sulm të paprovokuar.

Gjatë të hënës, Rusia lëshoi ​​një breshëri zjarri me raketa dhe artileri në një numër zonash lindore, ku si pasojë tetë civilë u vranë në qytetin e Kreminës, në Luhansk dhe në zonën e Donetsk.