Miratimi për pankartën e futbollit “Hungaria e Madhe” irriton Rumaninë

Njoftimi i Shoqatës Hungareze të Futbollit se do të lejonte tifozët në ndeshjet ndërkombëtare të shfaqin hartat e “Hungarisë së Madhe” në flamuj ose parulla, ka tërhequr akuza për revizionizëm historik në Rumani.

Politikanët rumunë dhe Unioni Rumun i Futbollit kanë kritikuar Unionin Hungarez të Futbollit (MLSZ), i cili njoftoi të martën se UEFA kishte vendosur që shfaqja e hartës së Hungarisë së Madhe në flamuj ose pankarta në ndeshje nuk përbën një akt racist, kështu që tifozët hungarezë do të mund të përdorin simbolin në ndeshjet zyrtare.

Zëdhënësi i Partisë Kombëtare Liberale në pushtet të Rumanisë dhe ish-ministri i sportit, Ionut Stoe, tha të mërkurën se vendimi do të inkurajonte revizionizmin historik në Hungari, ku nacionalistët kërkojnë kufijtë shumë më të mëdhenj të Hungarisë të para Luftës së Parë Botërore, që përfshinin pjesën më të madhe të Rumanisë së sotme.

“Një ngjarje e tillë do të krijonte një precedent të rrezikshëm. Do të shkonte kundër të gjitha parimeve të sportit. Kjo do t’i jepte vetëm një shtysë ekstremistëve që janë gjithmonë duke peshkuar në kohë të trazuara si sot,” tha Stroe.

Në pritje të sqarimit të pozicionit të UEFA-s, ai këshilloi të gjithë të mos komentojnë atë që mund të jetë “një histori joreale” dhe i shërben vetëm qëllimeve “të atyre që duan tension, ndarje dhe dobësim të shoqërive tona”.

MLSZ lëshoi një deklaratë duke lejuar përdorimin e flamujve dhe pankartave të tilla në ndeshje pasi “simbolizon respektin për Hungarinë historike dhe solidaritetin me tifozët jashtë vendit”.

“Tifozët lejohen të tregojnë vetëm hartën përfaqësuese të Hungarisë së Madhe, asnjë simbol apo mbishkrim tjetër”, shpjegoi MLSZ.

Kombëtarja hungareze pret Estoninë në një miqësore ndërkombëtare në Budapest të premten dhe Bullgarinë në një ndeshje kualifikuese të hënën. MLSZ paralajmëroi tifozët se flamujt ose shallet nuk duhet të përmbajnë asnjë slogan politik ose racist, përndryshe ato do të ndalohen.

“Futbolli nuk është politikë,” komentoi Ministri hungarez i Financave Mihaly Varga njoftimin e Federatës Hungareze të Futbollit.

Ironikisht, Varga – i cili nuk është një nga nacionalistët në qeverinë e Viktor Orban – bëri njoftimin e tij në Facebook përpara një harte të Hungarisë së Madhe.

Federata Rumune e Futbollit, FRF, ndërkohë ka kërkuar një këndvështrim zyrtar nga UEFA dhe menjëherë pas kësaj e ka publikuar përgjigjen në faqen zyrtare të mërkurën, ku pretendon se UEFA nuk ka lejuar që harta historike e Hungarisë së Madhe të shfaqet në ndeshjet ndërkombëtare, të tilla si preliminaret e EURO 2024.

“UEFA nuk ka dhe nuk do të autorizojë shfaqjen e simboleve të përmendura nga Unioni Hungarez i Futbollit në ndeshjet e organizuara në nivel evropian”, theksoi FRF.

Unioni Rumun i Futbollit shpjegoi se homologu i tij hungarez bëri një gabim në njoftimin e tij, pasi shfaqja e këtyre simboleve përbën një devijim nga dispozitat e Kodit Disiplinor të UEFA-s në lidhje me mesazhet provokuese dhe/ose politike. FRF tha se do të informojë komisionet disiplinore nëse ky është rasti.

Kryeministri hungarez Viktor Orban është i njohur për promovimin e agjendës së tij nacionaliste përmes futbollit, si në Hungari ashtu edhe në vendet përreth ku shteti apo biznesmenët hungarez financojnë ose zotërojnë ekipe futbolli.

Në nëntor 2022, Orban veshi një shall me të shkruar “Hungaria e Madhe” në një ndeshje të ekipit të të seniorëve të Hungarisë.

Hungaria humbi dy të tretat e territorit të saj dhe një të tretën e popullsisë së saj – duke përfshirë 3.3 milionë hungarezë etnikë – sipas kushteve të Traktatit të ashpër të Trianonit të vitit 1920, i cili pasoi rënien e Austro-Hungarisë në fund të Luftës së Parë Botërore. Shumë hungarez ende e shohin këtë si një traumë kombëtare.

Territoret e humbura përfshijnë pjesë të asaj që sot është Austria, Rumania, Ukraina, Sllovakia, Serbia dhe Kroacia. Komunitete të rëndësishme hungareze ende jetojnë në Rumani, Sllovaki dhe Serbi./BI/