Dezinformon Kërstiq: Afrim Bunjaku nuk është vrarë

Branislav Kërstiq ka dezinformuar se gjoja rreshteri policor Afrim Bunjaku “nuk është vrarë” në sulmin terrorist të grupit me në krye të kërkuarin nga Interpoli Milan Radoiçiq, në Banjska më 24 shtator 2023.
Gazetari serb ka thënë në një emision të Klan Kosova, se Afrim Bunjaku “nuk është vrarë, por është në një mënyrë dëm kolateral”.

Deklarimet e tij kanë zgjuar reagime të shumta në Kosovë.

Por çka tha Kërstiq?

“Afrim Bunjaku nuk është vrarë, por është në një mënyrë dëm kolateral”.

Analiza:

Rreshteri I Policisë së Kosovës, Afrim Bunjaku është vrarë në krye të detyrës.
Ai u vra më 24 shtator 2023, nga një grup i armatosur serb në fshatin Banjska të Zveçanit.

Policia e Kosovës dhe Prokuroria e Specializuar e Kosovës e kanë klasifikuar ngjarjen si sulm terrorist. Ndërsa krerët shtetërorë e kanë cilësuar si agresion të Serbisë.

Identiteti i autorëve është i njohur.
Grupi i armatosur është udhëhequr nga Milan Radoiçiq, i cili është në kërkim ndërkombëtar nga Interpol dhe ka marrë përgjegjësinë për sulmin përmes një deklarate publike.

Afrim Bunjaku është shpallur hero dhe është dekoruar me Medaljen Presidenciale për Trimëri, si viktimë e rënies në detyrë gjatë mbrojtjes së rendit dhe sovranitetit të vendit.

Si përfundim del në pah se deklarata e gazetarit serb, Branislav Kërstiq është e pavërtetë dhe në kundërshtim me faktet zyrtare.

Ky pretendim minimizon një akt të rëndë terrorist dhe dezinformon publikun mbi një çështje serioze të sigurisë kombëtare.

/The Geopost