Arrestimi i Maduros dhe lidhjet e ngushta me Serbinë dhe Vuçiqin

Arrestimi i presidentit autoritar të Venezuelës, Nicolás Maduro, nga Shtetet e Bashkuara ka rikthyer në vëmendje marrëdhëniet e ngushta politike dhe diplomatike që ai kishte ndërtuar ndër vite me Serbinë dhe presidentin e saj, Aleksandar Vuçiq.

Në vitet e fundit, Maduro ka riafirmuar vazhdimisht aleancën strategjike dhe miqësinë me Serbinë, duke theksuar mbështetjen e Venezuelës për integritetin territorial të Serbisë dhe mosnjohjen e pavarësisë së Kosovës.

Mediat ndërkombëtare raportojnë se kjo mbështetje është shfrytëzuar nga Beogradi edhe për sulme diplomatike kundër Kosovës.

Marrëdhëniet mes dy vendeve u konfirmuan edhe përmes disa bisedave telefonike mes Vuçiqit dhe Maduros, gjatë të cilave u diskutua thellimi i bashkëpunimit politik, ekonomik dhe ndërkombëtar, si dhe planet për një vizitë zyrtare të Maduros në Beograd.

Një nga pikat e theksuara ishte edhe konfirmimi i pjesëmarrjes së Venezuelës në EXPO 2027 në Beograd, si hap për forcimin e bashkëpunimit dypalësh.

Presidenti serb e ka quajtur Maduron “një mik të madh të Serbisë”, duke deklaruar publikisht se bisedat mes tyre ishin “të mira dhe kuptimplota”, me fokus ruajtjen e multilateralizmit dhe forcimin e marrëdhënieve dypalëshe.

Vuçiq e  kishte falënderuar Maduron edhe për qëndrimin e Venezuelës kundër njohjes së Kosovës, duke e cilësuar atë si mbështetje parimore dhe të vazhdueshme për Serbinë.

Ndërkohë, situata në Venezuelë ka marrë një kthesë dramatike.

Presidenti amerikan Donald Trump deklaroi se Shtetet e Bashkuara do ta “qeverisin” Venezuelën për një periudhë të pacaktuar, pas kapjes së Maduros dhe bashkëshortes së tij gjatë një operacioni ushtarak në Karakas.

Trump tha se synimi është ndryshimi i regjimit dhe rindërtimi i infrastrukturës së naftës, duke theksuar se kompanitë amerikane do të investojnë miliarda dollarë në sektorin energjetik të vendit.

Sipas Trumpit, Maduro dhe bashkëshortja e tij po dërgohen në Nju Jork, ku do të përballen me akuza për trafik droge, armësh dhe terrorizëm.

Ai nuk përjashtoi as mundësinë e vendosjes së trupave amerikane në Venezuelë, duke deklaruar se SHBA-të “nuk kanë frikë të vendosin ushtarë në terren”./TheGeoPost.