SHBA-të dhe Irani dështojnë të arrijnë marrëveshje pas bisedimeve maratonë

Zëvendëspresidenti JD Vance dhe zyrtarë të tjerë të lartë të administratës Trump po kthehen në shtëpi duarbosh.

Negociatat maratonë me Iranin në Pakistan këtë fundjavë dështuan të prodhonin një përparim që do t’i jepte fund përfundimisht luftës, e cila po hyn në javën e saj të shtatë.

Vance tha se iranianët refuzuan të jepnin garanci se nuk do të përpiqeshin të siguronin ose zhvillonin një armë bërthamore, raporton Politico.

“Ata kanë zgjedhur të mos i pranojnë kushtet tona. Fakti i thjeshtë është se ne duhet të shohim një angazhim afirmativ se ata nuk do të kërkojnë një armë bërthamore dhe nuk do të kërkojnë mjetet që do t’i mundësonin ata të arrinin shpejt një armë bërthamore”, th Vance.

Negociatat – takimi i nivelit më të lartë midis një zyrtari amerikan dhe iranianëve që nga revolucioni islamik i vitit 1979 – ishin një përpjekje për të rihapur Ngushticën e Hormuzit dhe për të parandaluar atë që Presidenti Donald Trump kërcënoi se do të ishte një fushatë bombardimi për ta kthyer Iranin në “epokën e gurit”.

Ato erdhën ndërsa ekonomia botërore po lëkundet, çmimet e naftës dhe mallrave të tjera janë rritur ndjeshëm dhe mes shqetësimit në rritje brenda dhe jashtë vendit se ka pak rrugëdalje të lehta për të shmangur një luftë të gjatë dhe të kushtueshme.

Vance nuk tha nëse kjo do të thoshte që Shtetet e Bashkuara dhe Izraeli do të rifillonin sulmet e tyre ndaj Iranit, apo do t’i përshkallëzonin ato, ndoshta duke synuar infrastrukturën civile, siç ka kërcënuar presidenti.

“Lajmi i keq është se nuk kemi arritur një marrëveshje. Dhe mendoj se ky është një lajm i keq për Iranin shumë më tepër sesa për Shtetet e Bashkuara të Amerikës”, u shpreh Vance.

Trump, i cili po shihte një ndeshje të UFC-së në Miami ndërsa Vance informoi median në Islamabad, nuk ka thënë nëse do të vazhdonte aty ku e la javën e kaluar – duke kërcënuar të shkatërronte qytetërimin iranian.

“Ne fitojmë pavarësisht kësaj”, tha Trump më herët të shtunën. “Ne i mundëm ata ushtarakisht”.

Por me sa duket, fitorja ushtarake e Shteteve të Bashkuara nuk ishte e mjaftueshme për të siguruar që objektivi më i qëndrueshëm i presidentit – për ta penguar Iranin të pajiset me armë bërthamore – të arrihej.

“Ne i kemi bërë shumë të qarta cilat janë vijat tona të kuqe”, deklaroi Vance.

The GeoPost