Rutte: Sulmet ruse nuk tregojnë seriozitet për paqe, NATO do të forcojë mbështetjen për Ukrainën

Sekretari i Përgjithshëm i NATO-s, Mark Rutte, deklaroi gjatë një vizite në Kiev të martën, më 3 shkurt, se sulmet e fundit të Rusisë ndaj Ukrainës nuk sinjalizojnë gatishmëri reale të Moskës për paqe, pavarësisht përpjekjeve diplomatike për të ndalur luftimet.

Duke folur para deputetëve të Verkhovna Rada-s, parlamentit ukrainas, Rutte tha se megjithëse po zhvillohen bisedime të drejtpërdrejta për t’i dhënë fund konfliktit, veprimet ushtarake të Rusisë tregojnë të kundërtën.

“Bisedimet e drejtpërdrejta janë duke u zhvilluar dhe kjo është një arritje e rëndësishme, por sulmet ruse si ato të mbrëmshme nuk japin sinjale serioze për paqe”, tha Rutte.

Komentet e tij vijnë pasi Rusia ndërmori të martën atë që autoritetet ukrainase e përshkruan si sulmin më të fuqishëm të këtij viti ndaj infrastrukturës energjetike të vendit, duke lënë qindra mijëra qytetarë pa ngrohje, në prag të një raundi të ri bisedimesh të planifikuara të zhvillohen në Abu Dhabi.

Rutte u bëri thirrje vendeve anëtare të NATO-s që të shfrytëzojnë rezervat e tyre për t’i siguruar Ukrainës sisteme shtesë të mbrojtjes ajrore, në përpjekje për të përballuar sulmet e vazhdueshme ruse me dronë dhe raketa.

Ai theksoi se angazhimi i NATO-s për Ukrainën mbetet i pandryshuar, pavarësisht tensioneve mes Shteteve të Bashkuara dhe disa aleatëve të saj lidhur me kërkesat e administratës Trump për Groenlandën.

Sipas Rutte, vendet evropiane të NATO-s janë të gatshme të ofrojnë garanci të forta sigurie dhe, nëse është e nevojshme, të vendosin forca në Ukrainë për të siguruar zbatimin e çdo armëpushimi të ardhshëm.

“Garancitë e sigurisë janë thelbësore. Arritja e një marrëveshjeje për t’i dhënë fund kësaj lufte do të kërkojë zgjedhje të vështira”, tha ai, duke shtuar se Ukraina duhet të ketë siguri të plotë se sakrificat e bëra deri më tani nuk do të shkojnë dëm.

Rutte mbërriti në Kiev për një vizitë surprizë vetëm disa orë pasi Rusia kreu një nga sulmet më të mëdha me dronë dhe raketa të këtij viti. Gjatë vizitës, ai dhe presidenti ukrainas Volodymyr Zelensky vendosën lule në një memorial në qendër të Kievit, në nderim të ushtarëve të rënë gjatë pushtimit rus.

Në fjalimin e tij para parlamentit, Rutte pranoi se rruga drejt përfundimit të luftës do të përfshijë vendime “të vështira dhe të dhimbshme”, por nënvizoi se Ukraina nuk duhet të dyshojë se sakrificat e saj kanë qenë të kota.

The Geo Post