Dhunë brutale në rrugët e Teheranit, Trump: Iranianët po kërkojnë liri, Amerika është gati t’i ndihmojë

Disa njerëz që protestuan në Iran gjatë ditëve të fundit kanë folur rreth turmave të mëdha, si dhe dhunës brutale në rrugët e Teheranit , me një grua që tha se pa “trupa të grumbulluar mbi njëri-tjetrin” në një spital.

Një grua rreth të 60-ave dhe një burrë 70-vjeçar përshkruan se kishin parë njerëz të të gjitha moshave në rrugët e kryeqytetit iranian të enjten dhe të premten. Megjithatë, të premten në mbrëmje, forcat e sigurisë që mbanin pushkë ushtarake vranë “shumë njerëz”, thanë ata duke folur në kushte anonimiteti për arsye sigurie.

Protestat, të cilat filluan më 28 dhjetor si demonstrata në pazaret e Teheranit kundër inflacionit të shfrenuar, që atëherë janë përhapur në më shumë se 100 qytete, duke paraqitur sfidën më të madhe për regjimin iranian në vite.

Presidenti i SHBA-së, Donald Trump, tha se iranianët po “kërkojnë liri”, ndërsa protestat vazhdojnë të përhapen në të gjithë vendin, duke shtuar se Uashingtoni është gati të ofrojë mbështetje.

“Irani po kërkon liri, ndoshta si kurrë më parë”, shkroi Trump në platformën e tij Truth Social, duke shtuar, “SHBA-të janë gati të ndihmojnë!!!”

Duke dhënë një pasqyrë të rrallë mbi natyrën e protestave mes një ndërprerjeje të vazhdueshme të internetit, demonstruesit në një lagje tjetër të Teheranit i thanë se kishin ndihmuar një burrë rreth të 60-ave, i cili ishte plagosur rëndë gjatë përleshjes. Ata thanë se ai kishte rreth 40 fishekë të ngulur në këmbë dhe një krah të thyer.

Ata u përpoqën t’i jepnin ndihmë mjekësore burrit në disa spitale të ndryshme, por thanë se situata ishte “plotësisht kaotike”.

Protestues të tjerë thanë se numri i njerëzve në rrugë ishte i pakrahasueshëm me çdo gjë që kishin përjetuar më parë, duke i përshkruar skenat si “jashtëzakonisht të bukura dhe shpresëdhënëse”.

Një fjalim televiziv nga udhëheqësi suprem i vendit, Ajatollah Ali Khamenei, të premten në mbrëmje e ndryshoi këtë atmosferë. Pak më vonë, shtypja u bë tepër e dhunshme, thanë protestuesit.

“Fatkeqësisht, mund të na duhet të pranojmë realitetin se ky regjim nuk do të tërhiqet i mundur pa forcë të jashtme”, tha një protestues për CNN.

Të paktën 65 persona kanë vdekur dhe më shumë se 2,300 janë arrestuar në të gjithë vendin në 13 ditët e fundit gjatë trazirave, sipas Agjencisë së Lajmeve të Aktivistëve të të Drejtave të Njeriut (HRANA) me seli në SHBA. Kjo shifër mund të jetë shumë më e lartë pasi HRANA tha se nuk është e mundur të përcaktohet një numër i saktë i vdekjeve për shkak të ndërprerjes së internetit.

Agjencia, e cila mbron çështjet e të drejtave të njeriut në Iran, tha në një përditësim të premten se protesta janë regjistruar në 512 vende në 180 qytete.

Thuhet se 50 nga të vrarët ishin protestues, 14 ishin zyrtarë të zbatimit të ligjit ose forca të sigurisë dhe një ishte një “civil i lidhur me qeverinë”.

Një mjek iranian në qytetin verilindor të Neyshaburit i tha në një mesazh audio se autoritetet iraniane përdorën “pushkë ushtarake” për të vrarë “të paktën 30 persona” atje të premten.

«Midis tyre kishte edhe fëmijë», tha mjeku. «Një fëmijë 5-vjeçar u qëllua ndërsa ishte në krahët e nënës së tij». Mjeku shtoi se sulmet lanë shumë të plagosur dhe se autoritetet kanë qëlluar këmbësorë dhe kalimtarë.

Të shtunën, 100 persona u arrestuan në qarkun iranian të Baharestanit pranë Teheranit për prishje të rendit publik dhe udhëheqje të “trazirave”, tha një zyrtar lokal për agjencinë gjysmëzyrtare të lajmeve Tasnim.

Deri me tani, ende nuk dihet numri i saktë i të vrarëve, apo të arrestuarve gjatë protestave.