250-vjetori i Pavarësisë, Trump: Amerika hyn në një “Epokë të Re të Artë”

Presidenti amerikan Donald Trump ka shënuar 250-vjetorin e miratimit të Deklaratës së Pavarësisë me një proklamatë presidenciale, duke e cilësuar 4 Korrikun si një datë që ndryshoi historinë e Shteteve të Bashkuara dhe duke bërë thirrje për festime mbarëkombëtare në nder të këtij jubileu historik.

Trump riktheu vëmendjen te ngjarjet e 4 korrikut 1776, kur 56 përfaqësues të 13 kolonive amerikane miratuan Deklaratën e Pavarësisë në Filadelfia, duke shpallur ndarjen nga Mbretëria Britanike dhe duke hedhur themelet e shtetit amerikan.

Presidenti amerikan e përshkroi Deklaratën e Pavarësisë si dokumentin që vendosi parimet mbi të cilat u ndërtuan Shtetet e Bashkuara, duke përmendur të drejtën për jetën, lirinë dhe kërkimin e lumturisë si vlera që, sipas tij, vazhdojnë të udhëheqin vendin edhe sot.

Trump kujtoi sakrificat e brezit themelues, duke përmendur figurat historike si Thomas Jefferson, autorin kryesor të Deklaratës së Pavarësisë, Richard Henry Lee, i cili propozoi shpalljen e pavarësisë, si dhe George Washington, komandantin e Ushtrisë Kontinentale gjatë Luftës Revolucionare Amerikane.

Në mesazhin e tij, ai rikujtoi betejat vendimtare të revolucionit amerikan, përfshirë Lexingtonin, Concordin, Bunker Hill, kalimin e lumit Delaware dhe fitoren përfundimtare në Yorktown, të cilat çuan në krijimin e një shteti të pavarur.

Presidenti amerikan e paraqiti historinë e SHBA-së si një rrugëtim të vazhdueshëm drejt zhvillimit ekonomik, industrial dhe teknologjik, duke përmendur zgjerimin drejt perëndimit, ndërtimin e ekonomisë moderne, shfuqizimin e skllavërisë, rolin e vendit në dy luftërat botërore, zbarkimin në Hënë dhe zhvillimin e teknologjive që ndryshuan botën, si telefoni, kompjuteri personal dhe interneti.

Një pjesë e rëndësishme e proklamatës iu kushtua vizionit të administratës së tij për të ardhmen e Shteteve të Bashkuara.

Trump deklaroi se vendi po hyn në atë që ai e quajti “Epoka e Re e Artë Amerikane”, duke premtuar forcimin e sovranitetit, mbrojtjen e kufijve, zhvillimin e inteligjencës artificiale dhe teknologjive kuantike, rritjen e prodhimit energjetik, rikthimin e amerikanëve në Hënë dhe dërgimin e misioneve drejt Marsit.

Ai premtoi gjithashtu forcimin e rendit dhe ligjit, mbrojtjen e qytetarëve amerikanë, zgjerimin e prosperitetit ekonomik dhe mbrojtjen e vlerave tradicionale mbi të cilat, sipas tij, është ndërtuar vendi.

Në fund të proklamatës, Trump falënderoi brezat që ndërtuan dhe mbrojtën Shtetet e Bashkuara, duke i cilësuar ata si themeli i suksesit amerikan.

Ai u bëri thirrje qytetarëve amerikanë që 250-vjetorin e Deklaratës së Pavarësisë ta festojnë me krenari dhe me ceremoni që nderojnë historinë, trashëgiminë dhe arritjet e Republikës Amerikane.

“Në këtë 250-vjetor të Pavarësisë sonë të lavdishme, ne riafirmojmë se kombi ynë u lind nga guximi dhe u ndërtua mbi sakrificat e patriotëve liridashës. Si një popull i vetëm amerikan, ne do ta çojmë përpara frymën që themeluesit tanë ndezën në Filadelfia dhe, me ndihmën e Zotit, do ta bëjmë Amerikën më të fortë, më krenare, më të pasur dhe më të madhe se kurrë më parë”, thuhet në përfundim të proklamatës presidenciale.

Në bazë të autoritetit të tij kushtetues, Trump shpalli zyrtarisht 4 korrikun 2026 si 250-vjetorin e miratimit të Deklaratës së Pavarësisë dhe u bëri thirrje të gjithë amerikanëve ta shënojnë këtë përvjetor historik me aktivitete dhe ceremoni përkujtimore në mbarë vendin.

Deklarata e lëshuar nga Shtëpia e Bardhë.

The GeoPost