Pavarësisht reagimeve, vazhdon glorifikimi i Mlladiqit – organizohen autobusë të shumtë për funeralin e tij

Pavarësisht reagimeve të vazhdueshme kundër glorifikimit të kriminelëve të dënuar të luftës, në Bosnjë dhe Hercegovinë dhe Mal të Zi po organizohet transport me autobusë drejt Beogradit për funeralin e Ratko Mladiqit.

Mladiq, ish-komandant i Ushtrisë së Republika Srpska, ishte dënuar me burgim të përjetshëm për gjenocidin në Srebrenicë, krime kundër njerëzimit dhe krime lufte.

Funerali i tij është planifikuar të mbahet më 7 shtator në Beograd, ndërsa organizatat e veteranëve në disa qytete kanë nisur organizimin e transportit për qytetarët dhe ish-pjesëtarët e Ushtrisë së Republika Srpska që duan të marrin pjesë.

Sipas raportimeve të mediave rajonale, deri më tani bëhet fjalë për të paktën 13 autobusë të konfirmuar vetëm nga disa qytete, ndërsa nga Sarajeva Lindore ka njoftime se drejt Beogradit mund të nisen dhjetëra autobusë.

Organizata e Veteranëve të Republika Srpska (BORS) kishte njoftuar më herët organizimin e transportit për të interesuarit, ndërsa organizatat lokale më pas kanë publikuar detaje për nisjet.

Vetëm nga Bijeljina pritet të nisen të paktën shtatë autobusë. Kryetari i Organizatës së Veteranëve të qytetit, Miodrag Stevanoviq, ka deklaruar se, nëse paraqitet nevoja, mund të sigurohen edhe autobusë të tjerë.

Pesë autobusë janë paralajmëruar nga Zvorniku, ndërsa nga Kozarska Dubica është siguruar një autobus dhe po shqyrtohet mundësia e angazhimit të një të dyti.

Organizim më i madh është paralajmëruar nga Sarajeva Lindore. Goran Šehovac, kryetar i Asamblesë së Organizatës Komunale të Veteranëve “Ilidžanski Borac”, ka deklaruar se dhjetëra autobusë pritet të nisen drejt Beogradit.

Sipas RTRS-së, autobusët nga Sarajeva Lindore pritet t’u bashkohen atyre nga Pale, Sokolaci, Han Pijesak, Zvorniku dhe Bijeljina, ndërsa më pas të vazhdojnë së bashku drejt kryeqytetit të Serbisë. Në Bijeljina parashihet t’u bashkohen edhe autobusë nga Krajina dhe Hercegovina.

Transport është paralajmëruar gjithashtu nga Trebinja, ndërsa organizim i ngjashëm po bëhet edhe në Mal të Zi. Nga Plevlja është organizuar autobus drejt Beogradit nga qendra kulturore serbe “Patriarku Varnava”.

Organizimi në shkallë të gjerë i pjesëmarrjes në funeral vjen në një kontekst ku glorifikimi publik i Mladićit dhe figurave të tjera të dënuara për krime lufte ka shkaktuar prej vitesh reagime të ashpra në Bosnjë dhe Hercegovinë dhe më gjerë në rajon.

Mladiq mbetet një figurë veçanërisht e ndjeshme për shkak të rolit të tij gjatë luftës në Bosnjë dhe Hercegovinë dhe dënimit përfundimtar me burgim të përjetshëm.

Megjithatë, në pjesë të shoqërisë serbe dhe veçanërisht në qarqe nacionaliste, ai vazhdon të trajtohet si hero, pavarësisht vendimeve përfundimtare të drejtësisë ndërkombëtare.

The GeoPost