Parlamenti Evropian mesazh të prerë Serbisë: Normalizimi i raporteve me Kosovën, kusht kyç për integrimin

Parlamenti Evropian i ka bërë thirrje zyrtare Serbisë që të ndërmarrë hapa konkretë dhe të menjëhershëm drejt normalizimit të marrëdhënieve me Kosovën, duke e cilësuar këtë proces si një kusht të pashmangshëm dhe kyç në rrugëtimin e saj drejt anëtarësimit në Bashkimin Evropian.

Përmes një reagimi zyrtar të shpërndarë në rrjetet sociale, institucionet evropiane i kanë kujtuar Beogradit zyrtar se përparimi drejt bllokut evropian nuk mund të bëhet pa një përkushtim të sinqertë ndaj vlerave themelore të BE-së.

“Serbia duhet të tregojë përkushtim të vërtetë ndaj vlerave të Bashkimit Evropian. Përparimi drejt anëtarësimit në BE është i mbyllur pa reforma të thella në sundimin e ligjit dhe forcimin e standardeve demokratike. Serbia duhet t’i normalizojë marrëdhëniet me Kosovën”, thuhet në deklaratën e prerë të Parlamentit Evropian.

Zgjedhjet dhe kriza politike në fokus

Përveç dialogut me Kosovën, eurodeputetët kanë vënë theksin edhe te situata e brendshme politike në Serbi.

Parlamenti Evropian ka nënvizuar se mbajtja e zgjedhjeve të lira, të ndershme dhe demokratike është një hap emergjent për kapërcimin e krizës politike që ka përfshirë vendin muajt e fundit.

Sipas vlerësimit të PE-së, garantimi i një procesi zgjedhor transparent dhe me standarde mbetet shtylla kryesore për rikthimin e besimit të qytetarëve te institucionet dhe për sigurimin e stabilitetit afatgjatë politik në Serbi.

Ky paralajmërim i shtohet debateve të fundit mbi ngecien e procesit të integrimit të Serbisë, ku njohës të çështjeve politike dhe profesorë si Enver Bytyçi kanë vënë në dukje se refuzimi i fundit i BE-së lidhet pikërisht me deficitet demokratike dhe mungesën e vullnetit për reforma nga ana e udhëheqjes serbe.

The GeoPost