Në Prishtinë u mbajt konferenca “Demokracitë rezistente në epokën e informacionit”

Në Swiss Diamond Hotel është mbajtur të mërkurën konferenca ndërkombëtare “Demokracitë rezistente në epokën e informacionit – Perspektiva nordike mbi luftimin e dezinformimit dhe forcimin e qëndrueshmërisë shoqërore”, me pjesëmarrjen e përfaqësuesve institucionalë, diplomatëve dhe ekspertëve të komunikimit.

Ngjarja u organizua nga Ambasada e Finlandës në Kosovë në bashkëpunim me Ambasadën Suedeze dhe Konsullatën e Norvegjisë në Prishtinë, dhe me partnerët nga Kosova, The Geopsot dhe Hibrid.Info

Konferenca u hap me fjalë rasti nga ambasadorja e Finlandës në Kosovë, Eevamari Laaksonen, si dhe zëvendëskryeministri dhe ministri i Punëve të Jashtme, Glauk Konjufca.

Në fjalën e tij kryesore, eksperti i komunikimit strategjik dhe gazetari Markku Mantila trajtoi temën e reagimeve strategjike ndaj ndikimit në informacion, duke theksuar sfidat në rritje që lidhen me përhapjen e dezinformatave.

Programi i konferencës përfshiu diskutime të moderuara dhe sesione pyetje-përgjigje me ekspertë ndërkombëtarë, ndërsa një nga momentet kryesore ishte paneli mbi ndërtimin e qëndrueshmërisë shoqërore ndaj dezinformimit dhe ndikimit të huaj informativ (FIMI).

Në panel morën pjesë ekspertë si Saara Jantunen-Paju, Saara Salomaa, ligjëruesi dhe gazetari Dren Gerguri, si dhe gazetarja hulumtuese Jessikka Aro, e cila ndau përvojat e saj në ekspozimin e luftës informative.

Pas pjesës plenare, konferenca vijoi me një sesion punëtorie të fokusuar në forcimin e edukimit medial përmes një qasjeje gjithëpërfshirëse shoqërore.

Punëtoria prezantoi modelin finlandez të edukimit medial, duke theksuar bashkëpunimin ndërmjet institucioneve publike, sistemit arsimor, mediave dhe shoqërisë civile.

Pjesëmarrësit diskutuan mundësitë e përshtatjes së këtij modeli në kontekstin e Kosovës, duke identifikuar sfidat aktuale dhe hapat e nevojshëm për rritjen e rezistencës ndaj dezinformatave.

Konferenca synoi të forcojë bashkëpunimin ndërkombëtar dhe të ofrojë praktika konkrete për përballimin e sfidave të epokës digjitale, ku dezinformimi po konsiderohet gjithnjë e më shumë si kërcënim për demokracitë moderne.

The GeoPost