NATO kërkon nga Serbia përgjegjësi të plotë për sulmin e armatosur në Banjskë

NATO i kushton vëmendje të veçantë Ballkanit Perëndimor, duke pasur parasysh zhvillimet shqetësuese të viteve të fundit, ka deklaruar një zyrtar i lartë i Aleancës Veriatlantike, duke theksuar se përgjegjësia kryesore për ruajtjen e stabilitetit në rajon bie mbi liderët lokalë.

Gjatë një bisede me gazetarë nga Ballkani Perëndimor në Bruksel, zyrtari i NATO-s vuri në pah rëndësinë strategjike të rajonit dhe theksoi se Aleanca mbetet thellësisht e angazhuar për stabilitetin afatgjatë. Ai nënvizoi se NATO “nuk do të lejojë krijimin e një vakumi sigurie në Ballkanin Perëndimor”, shkruan N1.

“Po shohim disa tendenca shqetësuese në rajon, veçanërisht në vitet e fundit, të cilat kërkojnë monitorim të kujdesshëm të zhvillimeve”, tha zyrtari, duke rikujtuar sulmet e ndodhura në Kosovë gjatë vitit 2023. Sipas tij, këto incidente kanë shkaktuar shqetësime serioze mes aleatëve të NATO-s, pasi ndikimi i tyre nuk kufizohet vetëm në Kosovë, por mund të ketë pasoja më të gjera rajonale.

Përveç incidenteve të sigurisë, zyrtari i NATO-s përmendi edhe një sërë faktorësh të tjerë shqetësues në Ballkanin Perëndimor, përfshirë fushatat e dezinformimit, kërcënimet hibride, tensionet politike, retorikën përçarëse, si dhe mungesën e përparimit konkret në dialogun ndërmjet Kosovës dhe Serbisë.

“Nuk shohim rrezik për përshkallëzim, të paktën për momentin, por ka shumë arsye për të qëndruar vigjilentë, të angazhuar dhe për të vazhduar monitorimin e kujdesshëm të situatës. Kjo është pikërisht ajo që NATO po bën dhe do të vazhdojë ta bëjë”, tha ai.

Zyrtari theksoi gjithashtu se zhvillimet në Ballkanin Perëndimor nuk ndodhin në izolim. “Rajoni nuk është imun ndaj tendencave dhe kërcënimeve të jashtme dhe, për shkak të ndjeshmërisë politike dhe të sigurisë, mund të jetë edhe më i cenueshëm. Për këtë arsye, besojmë se NATO, si aktor stabilizues, dhe aktorët e tjerë ndërkombëtarë kanë arsye të jenë edhe më të kujdesshëm dhe më të angazhuar”, u shpreh ai.

Sipas zyrtarit, NATO, në bashkëpunim me Bashkimin Evropian dhe komunitetin ndërkombëtar, vazhdon të mbështesë paqen dhe stabilitetin në Ballkanin Perëndimor, por këto objektiva nuk mund të arrihen vetëm përmes angazhimit ndërkombëtar.

“Përgjegjësia kryesore mbetet mbi liderët lokalë. Politikanët dhe udhëheqësit në Bosnjë e Hercegovinë, Serbi dhe Kosovë kanë përgjegjësi të drejtpërdrejtë për ruajtjen e stabilitetit në vendet e tyre”, tha ai, duke u bërë thirrje liderëve rajonalë që të angazhohen në mënyrë konstruktive për të arritur prosperitet, paqe të qëndrueshme, stabilitet, si dhe përparim në reformat dhe proceset integruese.

Këto deklarata u bënë para takimit të ministrave të Mbrojtjes të vendeve anëtare të NATO-s, i cili pritet të mbahet më 12 shkurt.

Zyrtari i NATO-s theksoi gjithashtu se Serbia mbetet një partner i rëndësishëm i Aleancës për stabilitetin rajonal dhe se forcimi i marrëdhënieve mes palëve është në interes të ndërsjellë. Megjithatë, ai nënvizoi se NATO kërkon përgjegjësi të plotë për sulmin ndaj pjesëtarëve të KFOR-it në maj të vitit 2023 në Zveçan, si dhe për sulmin e armatosur në Banjskë në shtator të po atij viti.

Sipas tij, ekzistojnë komunikime të rregullta mes Sekretarit të Përgjithshëm të NATO-s, Mark Rutte, dhe Presidentit të Serbisë, Aleksandar Vuçiq, përfshirë edhe çështjet që lidhen me incidentet e sigurisë në Kosovë.

Zyrtari rikujtoi se pas ngjarjeve të vitit 2023, numri i pjesëtarëve të KFOR-it u rrit me rreth 1.000 trupa shtesë. Megjithatë, për shkak të përmirësimit të situatës së sigurisë, forcat po reduktohen gradualisht dhe po kthehen në nivelin që ishte para vitit 2023.

Aktualisht, misioni i KFOR-it përbëhet nga më shumë se 4.600 pjesëtarë nga 33 vende të ndryshme, të cilët, sipas zyrtarit, japin “një kontribut të prekshëm për paqen dhe stabilitetin në rajon”.

Megjithatë, ai theksoi qartë se zgjidhja e problemeve në Ballkanin Perëndimor “nuk është ushtarake, por politike dhe përmes dialogut”. Për këtë arsye, NATO mbështet dialogun ndërmjet Kosovës dhe Serbisë nën ndërmjetësimin e Bashkimit Evropian, duke shpresuar që së shpejti të ketë përparim konkret, pasi kjo është thelbësore për stabilitetin afatgjatë të rajonit.

“Nuk është vetëm përgjegjësi e komunitetit ndërkombëtar, por edhe e aktorëve në rajon që të ndërmarrin hapat e nevojshëm dhe kompromiset e domosdoshme për të arritur një zgjidhje të qëndrueshme”, përfundoi zyrtari i NATO-s.

The Geo Post