Katër grupet kryesore në PE mbështesin rezolutën për Serbinë: Nuk ka më shpërblime për reforma të rreme

Katër grupet më të mëdha politike në Parlamentin Evropian kanë mirëpritur miratimin e rezolutës për Serbinë, duke theksuar se rruga e saj drejt anëtarësimit në Bashkimin Evropian duhet të bazohet në reforma të mirëfillta demokratike dhe në përmbushjen e kritereve të anëtarësimit.

Rezoluta, e bazuar në raportin e eurodeputetit kroat Tonino Picula, u miratua të mërkurën në Bruksel me 468 vota pro, 116 kundër dhe 79 abstenime. Në të evidentohet prapambetja demokratike e Serbisë, si dhe mospërputhja e saj me politikën e përbashkët të jashtme dhe të sigurisë të Bashkimit Evropian.

Grupi më i madh në Parlamentin Evropian, Partia Popullore Evropiane (EPP), theksoi se procesi i anëtarësimit të Serbisë duhet të mbetet i bazuar në merita.

“Rruga e Serbisë drejt Bashkimit Evropian bazohet në merita dhe varet nga zbatimi i reformave të vërteta. Këto nuk janë vetëm kritere për anëtarësim – janë reforma që do ta forcojnë Serbinë dhe do të përmirësojnë jetën e qytetarëve të saj”, thuhet në reagimin e EPP-së.

Edhe grupi i Socialistëve dhe Demokratëve (S&D) vlerësoi se qytetarët e Serbisë janë të përkushtuar ndaj demokracisë dhe perspektivës evropiane, por akuzoi udhëheqjen politike të vendit se nuk po ndjek të njëjtin drejtim.

“BE-ja duhet të bëjë të njëjtën gjë. Nuk duhet të ketë më para të BE-së për prapambetjen demokratike të Vuçiqit. Nuk duhet të ketë më tolerim për zgjedhjet politike antievropiane. Nuk duhet të ketë më shpërblime për reforma të rreme. Çdo gjë më pak se kaq do të ishte një gabim i madh”, thuhet në deklaratën e grupit.

Në të njëjtën linjë u shpreh edhe grupi liberal “Renew Europe”, i cili kërkoi që Beogradit t’i dërgohet një mesazh i qartë.

“BE-ja nuk do ta shpërblejë prapambetjen. Anëtarësimi duhet të fitohet me meritë, e jo të jepet si dhuratë”, thuhet në reagim.

Ndërkaq, bashkëkryetarja e grupit të të Gjelbërve, Vula Tsetsi, deklaroi se çdo lëshim ndaj autoriteteve serbe pa reforma të mirëfillta demokratike do të ishte një sinjal i gabuar për qytetarët e Serbisë.

“Çdo lëshim ndaj autoriteteve të Serbisë, pa reforma të mirëfillta demokratike, u dërgon qytetarëve të këtij vendi mesazhin se lufta e tyre për demokraci është më pak e rëndësishme sesa interesat afatshkurtra gjeopolitike”, tha ajo.

Rezoluta e Parlamentit Evropian kritikon gjendjen e demokracisë në Serbi, sundimin e ligjit, lirinë e mediave dhe mungesën e harmonizimit të politikës së jashtme të Beogradit me atë të Bashkimit Evropian, duke theksuar se përparimi në procesin e integrimit do të varet nga zbatimi i reformave konkrete.

The GeoPost