Janjiq: Është legjitime të hetohen aferat e Orbanit dhe Vuçiqit

Eksperti i marrëdhënieve etnike, Dushan Janjiq, ka bërë thirrje për hetim mbi lidhjet ndërmjet presidentit të Serbisë, Aleksandar Vuçiq, dhe kryeministrit të Hungarisë, Viktor Orban, si dhe mbi projektet e përbashkëta mes dy vendeve.

Duke folur në podkastin “S Brezom”, Janjiq deklaroi se është “plotësisht legjitime” që një hetues evropian të shqyrtojë marrëdhëniet e Vuçiqit dhe familjes së tij me Orbanin.

Ai theksoi se një vëmendje e veçantë duhet t’i kushtohet projekteve infrastrukturore, përfshirë hekurudhën Beograd–Budapest, të cilën e cilësoi si një çështje që kërkon hetim të detajuar.

“Ky është një moment vërtet i rëndësishëm”, u shpreh ai.

Janjiq komentoi gjithashtu situatën rreth kompanisë Naftna Industrija Srbije (NIS), duke sugjeruar se zhvillimet lidhur me të po ndikohen nga Rusia.

Sipas tij, çështja e NIS mund të shënojë një pikë kthese në marrëdhëniet mes Beogradit dhe Budapestit, të cilat – siç tha ai – kanë nisur të forcohen në mënyrë të dukshme që nga viti 2014, edhe në aspektin ideologjik.

The Geopost