Beogradi vazhdon me provokime nacionaliste, në tribunat e futbollit shfaqet “Kosova është Serbi”

Një tjetër rast i provokimit nacionalist është shfaqur në një ndeshje futbolli, ku në tribunat e stadiumit është vendosur një pankartë me mbishkrimin “Kosova është Serbi”, e shoqëruar me hartën e Kosovës dhe simbole serbe.

Pamjet janë publikuar në rrjetet sociale nga faqja “Kosova dhe Metohija”, ndërsa mesazhi i shfaqur në tribunë është interpretuar si një tjetër përpjekje për të promovuar pretendimet territoriale të Serbisë ndaj Kosovës.

Raste të tilla janë shfaqur herë pas here në stadiumet dhe tribunat e futbollit në Serbi, ku aktivitetet sportive përdoren edhe për promovimin e mesazheve politike dhe nacionaliste.

Ndërkohë, për një incident të ngjashëm ka reaguar edhe klubi irlandez Larne, pas ndeshjes së zhvilluar ndaj Crvena Zvezdës në kuadër të kualifikimeve për Ligën e Kampionëve.

Larne FC konfirmoi se gjatë pjesës së parë të ndeshjes, në tribunën McKay të stadiumit Inver Park, ishte shfaqur një flamur me përmbajtje politike.

“Larne FC është në dijeni të një fotografie që po qarkullon nga ndeshja e mbrëmshme e Ligës së Kampionëve kundër FK Crvena Zvezda në Inver Park”, thuhet në komunikatën e klubit.

“Gjatë pjesës së parë, një flamur me përmbajtje politike u shfaq mbi tabelat reklamuese në tribunën McKay. Sapo kjo u vu re, stafi i sigurisë së stadiumit reagoi menjëherë për ta hequr flamurin”, thuhet më tej në reagimin e klubit irlandez.

Incidenti ka rikthyer në vëmendje përdorimin e tribunave të futbollit për shfaqjen e mesazheve politike dhe nacionaliste, veçanërisht në ndeshjet ku përfshihen klube nga Serbia.