Arrestohet një serb për krime lufte në Skenderaj, dyshohet për vrasje e tortura të dhjetra civilëve shqiptarë në ’99-ën

Policia e Kosovës, përmes Drejtorisë për Hetimin e Krimeve të Luftës, ka arrestuar sot në fshatin Soqanicë të Leposaviçit një të dyshuar mashkull, shtetas kosovar i nacionalitetit serb, nën dyshimin për kryerje të veprës penale “Krime lufte kundër popullatës civile”.

Sipas hetimeve të zhvilluara, i dyshuari, gjatë periudhës së luftës në Kosovë, në cilësinë e pjesëtarit të MUP-it të Serbisë dhe i sistemuar në Stacionin Policor të Skenderajt, dyshohet se në mars të vitit 1999 ka marrë pjesë në një operacion policor-ushtarak, së bashku me pjesëtarë të tjerë të organizuar në grup.

Ai, sipas Policisë, i uniformuar dhe i armatosur, dyshohet se ka qenë i përfshirë në dëbimin me dhunë të civilëve nga pronat e tyre, si dhe në rrahjen, torturimin, plagosjen dhe vrasjen e 15 civilëve shqiptarë, si dhe në zhdukjen e 16 civilëve të tjerë në dy lokacione në Skenderaj.

I dyshuari është intervistuar në prani të avokatit, ndërsa me aktvendim të prokurorit të rastit i është caktuar masa e ndalimit prej 48 orësh.

Arrestimi i fundit vjen pak javë pasi Gjykata në Prishtinë shqiptoi dënim me burgim ndaj dy ish-pjesëtarëve të forcave policore dhe ushtarake të Serbisë për krime lufte në Kosovë gjatë luftës së viteve 1998-99.

Gjykata në Prishtinë i dënoi më 18 mars Zoran Kostiqit me 15 vjet burgim, ndërsa Dragan Milloviqin me 7 vjet burgim.

Që nga përfundimi i luftës në Kosovë, institucionet gjyqësore vendëse dhe ato ndërkombëtare kanë dënuar rreth 74 persona për krime të luftës në Kosovë.

Gjatë luftës në Kosovë, nga viti 1998 deri në 1999, u vranë mbi 13.000 civilë, ndërsa mijëra të tjerë u zhdukën.

Mbi 1.600 persona vazhdojnë të jenë ende të pagjetur – pjesa më e madhe e tyre shqiptarë.

Gjyqësori i Kosovës mori në duar trajtimin e rasteve të krimeve të luftës nga qershori i vitit 2018. Prokuroria Speciale e Kosovës ka departament për krimet e luftës që nga vitit 2015.

Deri në fund të 2024-tës janë ngritur gjithsej 14 aktakuza në mungesë kundër 72 pjesëtarëve të forcave serbe.

Në fund të vitit të kaluar u shpall edhe aktgjykimi i parë në mungesë. Çedomir Aksiq u dënua me 15 vjet burgim.

The GeoPost