KFOR reagon për rrëmbimin e qytetarit serb në Leposaviq: Jemi në dijeni të rastit në Leposaviq, situata në kufi e qetë

Misioni i Forcës së Kosovës (KFOR) ka reaguar pas raportimeve për plagosjen dhe rrëmbimin e një qytetari serb në Leposaviq, ngjarje për të cilën Policia e Kosovës ka nisur hetimet.

Në një përgjigje për Tëvë1, KFOR-i ka bërë të ditur se është në dijeni të raportimeve lidhur me incidentin dhe se situata e sigurisë përgjatë Vijës Kufitare Administrative (ABL) aktualisht është e qetë.

“Jemi në dijeni të këtyre raporteve. Situata e sigurisë në Vijën Kufitare Administrative është e qetë. Policia e Kosovës ka nisur një hetim dhe mbetet në kontakt të ngushtë për këtë qëllim me disa subjekte, përfshirë KFOR-in. PK-ja ka koordinuar aktivitetin e saj përkatës në anën e Kosovës të ABL-së me KFOR-in. Për çdo koment të mëtejshëm, ju referoj te PK-ja”, thuhet në përgjigjen e KFOR-it për Tëvë1.

KFOR-i theksoi se është në koordinim të vazhdueshëm me Policinë e Kosovës dhe institucionet tjera përgjegjëse për të siguruar qetësinë dhe stabilitetin në zonat kufitare.

Policia e Kosovës kishte njoftuar më herët se më 1 nëntor, një qytetar serb nga Leposaviqi është plagosur dhe më pas rrëmbyer nga persona që dyshohet se i përkasin xhandarmërisë serbe, në afërsi të zonës kufitare Kosovë–Serbi.

Hetimet për rastin janë në zhvillim./Teve1/