Ambasada amerikane: Autorët e sulmit në Banjskë duhet të mbahen përgjegjës

Ambasada e Shteteve të Bashkuara të Amerikës në Prishtinë ka reaguar të mërkurën, në trevjetorin e sulmit të armatosur në Banjskë të Zveçanit, duke kërkuar që autorët e këtij sulmi të mbahen përgjegjës.

Në një postim në Facebook, Ambasada amerikane ka nderuar policin e Kosovës, Afrim Bunjakun, i cili u vra më 24 shtator 2023 gjatë sulmit të një grupi të armatosur në Banjskë.

“Ne i bashkohemi Kosovës për të nderuar zyrtarin e Policisë së Kosovës, Afrim Bunjakun, i cili u vra në krye të detyrës gjatë sulmit në Banjskë në shtator të vitit 2023”, thuhet në reagimin e Ambasadës.

Ambasada ka ritheksuar gjithashtu thirrjen për vënien para drejtësisë të personave përgjegjës për sulmin.

“Ne ritheksojmë thirrjen tonë që autorët e këtij sulmi të mbahen përgjegjës”, thuhet në postim.

Sulmi në Banjskë ndodhi më 24 shtator 2023, kur një grup i armatosur sulmoi Policinë e Kosovës, duke vrarë rreshterin Afrim Bunjaku. Në përleshjet që pasuan, u vranë edhe disa nga sulmuesit.

Trevjetori i sulmit është shënuar me homazhe dhe aktivitete përkujtimore në Kosovë, ndërsa çështja e përgjegjësisë për organizimin dhe pjesëmarrjen në sulm vazhdon të jetë pjesë e kërkesave të institucioneve të Kosovës dhe partnerëve ndërkombëtarë.

The GeoPost