Nga “shfajësim” te “dënim i rëndë”: Si po manipulon Vuçiqi me deklaratat për aktgjykimin e ish-krerëve të UÇK-së

Presidenti i Serbisë, Aleksandar Vuçiq, po ndryshon narrativën e tij për aktgjykimin e ish-presidentit të Kosovës, Hashim Thaçi, dhe ish-krerëve të tjerë të Ushtrisë Çlirimtare të Kosovës, vetëm pak ditë para se Gjykata Speciale në Hagë të shpallë vendimin.

Fillimisht, Vuçiqi pretendoi se kishte marrë nga shërbimet serbe informacion se Thaçi kryesisht do të shfajësohej nga akuzat dhe se dënimi, nëse do të kishte një të tillë, do të mbulonte kohën që ai ka kaluar në paraburgim.

Tani, pas vizitës së tij në Paris, presidenti serb po paraqet një version tjetër.

Ai thotë se ka marrë “sinjale të ndryshme” nga ato që kishte dëgjuar më parë dhe se Thaçi mund të përballet me një dënim të rëndë.

“Para 15 ditësh mora informacion se ai do të dënohej me një masë që mbulon kohën e paraburgimit; këtë e mora nga shërbimet tona. Tani, kur isha në Paris dhe bisedoja me disa liderë evropianë e botërorë, mora disa sinjale të ndryshme. Pas katër ditësh do të shohim se kush ka të drejtë”, ka deklaruar Vuçiq.

Por pikërisht ky ndryshim i versionit e bën deklaratën e presidentit serb më shumë një lojë politike me pritshmëritë rreth vendimit, sesa një informacion të verifikueshëm për atë që do të vendosë Gjykata.

Gjykata ende nuk ka folur

Problemi kryesor me këtë mënyrë komunikimi është se vendimi gjyqësor ende nuk është bërë publik.

Pretendimet e Vuçiqit nuk shoqërohen me ndonjë provë që do të mund të verifikonte nëse shërbimet serbe kanë realisht informacion mbi përmbajtjen e aktgjykimit apo nëse “sinjalet” e pretenduara në Paris kanë lidhje me vendimin e Gjykatës.

Kështu, ai po përdor burime të pakonfirmuara, fillimisht shërbimet serbe, e më pas bisedat me liderë evropianë e ndërkombëtarë për të krijuar përshtypjen se Beogradi ka njohuri paraprake për një vendim që ende nuk është shpallur.

Në këtë mënyrë, procesi gjyqësor bëhet pjesë e një narrative politike: Vuçiqi nuk pret vetëm që Gjykata të flasë, por përpiqet të ndikojë paraprakisht në mënyrën se si publiku e percepton vendimin.

Një deklaratë që përshtatet me çdo rezultat

Pikërisht këtu qëndron edhe elementi më i dukshëm i manipulimit të narrativës.

Vuçiqi nuk po parashikon vetëm një rezultat, ai po vendos përpara publikut dy versione të ndryshme të së ardhmes.

Në njërin, Thaçi pritet të marrë një dënim që mbulon kohën e paraburgimit.

Në tjetrin, ai mund të përballet me një dënim të rëndë.

Duke i mbajtur të dyja mundësitë në qarkullim, presidenti serb e mbron veten nga mundësia që parashikimi i tij të dalë i gabuar.

Nëse aktgjykimi përputhet me versionin e parë, ai mund t’i referohet shërbimeve serbe.

Nëse përputhet me të dytin, mund të pretendojë se informacioni i marrë në Paris ishte i saktë.

Nëse asnjëri prej tyre nuk përputhet plotësisht me vendimin, ai përsëri mund të argumentojë se kishte folur vetëm për “sinjale” dhe jo për një informacion të sigurt.

Dhe pikërisht kjo i shërben narrativës politike të presidentit serb, të krijojë përshtypjen se Beogradi ka qasje në informacione që të tjerët nuk i kanë dhe se Serbia është në gjendje të dijë paraprakisht se cili do të jetë rezultati i një procesi gjyqësor ndërkombëtar.

Vendimi për Hashim Thaçin, Kadri Veselin, Jakup Krasniqin dhe Rexhep Selimin pritet të shpallet më 16 shtator në Hagë.

Katër ish-krerët e UÇK-së akuzohen për krime të pretenduara lufte dhe krime kundër njerëzimit, akuza të cilat ata i kanë mohuar.

Prokuroria ka kërkuar dënime të gjata me burgim, ndërsa mbrojtja ka kërkuar lirimin e të akuzuarve.

Deri në momentin e shpalljes së aktgjykimit, çdo pretendim për përmbajtjen e tij mbetet i pakonfirmuar.

The GeoPost