Veselinoviq sulmon Vuçiqin për funeralin e Mlladiqit: Do të gjunjëzohet mbi varrin e kujtdo për përfitime politike

Politikani opozitar serb Janko Veselinoviq ka kritikuar ashpër presidentin e Serbisë, Aleksandar Vuçiq, lidhur me mundësinë që ky i fundit të marrë pjesë në funeralin e ish-komandantit të Ushtrisë së Republikës Srpska, Ratko Mlladiq.

Në një deklaratë për gazetën serbe Danas, Veselinoviq e akuzoi Vuçiqin për oportunizëm politik, duke pretenduar se presidenti serb është i gatshëm të shfrytëzojë edhe ngjarje të tilla për përfitime politike.

“Frikacak dhe oportunist politik. Ai do të gjunjëzohet te varri i kujtdo nëse kjo i sjell pikë politike”, deklaroi Veselinoviq.

Sipas tij, vendimi i Vuçiqit për pjesëmarrjen në funeral do të përcaktohet nga kalkulimet politike dhe këshilltarët e tij.

Veselinoviq e akuzoi gjithashtu presidentin serb për lidhje me retorikën nacionaliste të viteve 1990, duke pretenduar se Vuçiq ishte “krijuesi politik” i sloganit “100 myslimanë për një serb”.

Deklaratat e tij vijnë në një kohë kur në Serbi është rikthyer debati për mënyrën se si duhet të trajtohet figura e Ratko Mlladiqit pas vdekjes së tij.

Mlladiqi, ish-komandant i Ushtrisë së Republikës Srpska gjatë luftës në Bosnje dhe Hercegovinë, u shpall fajtor nga Tribunali Penal Ndërkombëtar për ish-Jugosllavinë për gjenocid, krime kundër njerëzimit dhe krime lufte dhe u dënua me burgim të përjetshëm.

Në Serbi, ndërkohë, figura e tij vazhdon të jetë subjekt i përplasjeve të forta politike. Grupet nacionaliste dhe një pjesë e mbështetësve të tij e paraqesin atë si figurë heroike, ndërsa viktimat e luftës, familjet e tyre dhe organizatat që dokumentojnë krimet e luftës kundërshtojnë çdo përpjekje për glorifikimin ose rehabilitimin e tij.

Veselinoviq e ka lidhur këtë debat drejtpërdrejt me mënyrën se si Vuçiqi mund ta përdorë politikisht funeralin e Mlladiqit.

“Mladiqi, i gjallë apo i vdekur, është njësoj për Vuçiqin – një copë asfalt ose kanalizim që e premton, por nuk e mban kurrë”, tha ai për Danas, duke e përdorur këtë krahasim për të kritikuar atë që e konsideron si mospërmbushje të premtimeve politike nga presidenti serb.

Pjesëmarrja e Vuçiqit në funeral do të kishte peshë të veçantë politike, duke pasur parasysh të kaluarën e tij politike dhe përpjekjet e Serbisë për të ruajtur një ekuilibër mes retorikës së brendshme nacionaliste dhe marrëdhënieve me partnerët perëndimorë.

The GeoPost