Ngritet aktakuzë ndaj ish-policit Bojan Jevtiq – dyshohet për spiunazh dhe posedim të paligjshëm të armëve

Prokuroria Speciale ka ngritur aktakuzë ndaj Bojan Jevtiq, ish-zyrtar policor, i dyshuar për veprat penale “Spiunazhi” dhe “Mbajtja në pronësi, kontroll ose posedim i paautorizuar i armëve”.

Sipas aktakuzës, Jevtiq dyshohet se gjatë periudhës kohore deri më 17 korrik 2025, në cilësinë e togerit policor, ka mbledhur dhe ka transmetuar dokumente të klasifikuara zyrtare tek pjesëtarë të Shërbimit Inteligjent të Serbisë.

Hetimet pretendojnë se materialet e dërguara kanë pasur të bëjnë me sigurinë kombëtare dhe rendin kushtetues të Republikës së Kosovës, duke shkaktuar rrezik për institucionet shtetërore.

I njëjti ishte arrestuar më 17 korrik të vitit të kaluar gjatë një aksioni të autoriteteve, ndërsa rasti tashmë ka kaluar në fazën e gjykimit pas ngritjes së aktakuzës.

Autoritetet theksojnë se veprimet e dyshuara përbëjnë rrezik serioz për sigurinë kombëtare dhe integritetin institucional të vendit.