Beogradi në sinkron me Moskën, vazhdon narrativën kundër realitetit të Kosovës

Zëvendëskryeministri dhe Ministri i Brendshëm i Serbisë, Ivica Daçiq, ka zhvilluar një bisedë telefonike me ministrin e Jashtëm të Rusisë, Sergei Lavrov, në një moment kur Beogradi po intensifikon retorikën dhe veprimet diplomatike në linjë me Moskën, në raport me çështjen e Kosovës.

Sipas njoftimit zyrtar, Lavrov ka përsëritur qëndrimin e njohur të Rusisë për “ruajtjen e integritetit territorial dhe sovranitetit të Serbisë”, duke theksuar se Moska do të mbështesë një zgjidhje për Kosovën në përputhje me interesat serbe dhe interpretimin rus të së drejtës ndërkombëtare.

Kjo deklaratë vjen në vazhdën e një narrative të konsoliduar ruso-serbe, e cila kundërshton pavarësinë e Kosovës.

Në të njëjtën linjë, Daçiq dhe Lavrov theksuan përkushtimin ndaj politikave të udhëhequra nga presidentët Aleksandar Vuçiq dhe Vladimir Putin, duke e cilësuar bashkëpunimin dypalësh si strategjik dhe në zgjerim, veçanërisht në sektorin e energjisë.

Analistët e shohin këtë komunikim si pjesë të një strategjie më të gjerë të Serbisë për të ruajtur balancën midis Perëndimit dhe Rusisë, por njëkohësisht për të forcuar narrativën kundër njohjes ndërkombëtare të Kosovës.

Përmes koordinimit të vazhdueshëm me Moskën, Beogradi synon të mbajë të gjallë diskursin se statusi i Kosovës nuk është i mbyllur, pavarësisht realitetit në terren dhe njohjeve ndërkombëtare që ka marrë Kosova.

Në deklaratë theksohet gjithashtu “miqësia shekullore” dhe “afërsia e popujve vëllezër”, elemente që shpesh përdoren në komunikimin politik serbo-rus për të legjitimuar bashkëpunimin e ngushtë dhe për të ndërtuar një narrativë alternative ndaj asaj perëndimore.

Ky zhvillim konfirmon vijimësinë e një politike të dyfishtë të Serbisë: në njërën anë integrimi formal drejt Bashkimit Evropian, dhe në anën tjetër thellimi i lidhjeve politike, ekonomike dhe strategjike me Rusinë, duke përdorur çështjen e Kosovës si pikë kyçe për të sfiduar rendin dhe narrativën perëndimore në rajon.

The Geopost