MPJ e Malit të Zi thërret për konsultime diplomatin në Moskë pas deklaratave pro-ruse

Ministria e Punëve të Jashtme e Malit të Zi ka thirrur për konsultime Aleksandar Obradoviqin, sekretar i tretë në Ambasadën e Malit të Zi në Rusi, pas paraqitjeve të mëparshme publike në të cilat ai promovoi hapur qëndrime pro-ruse. Lajmin e konfirmoi dikasteri i drejtuar nga ministri Ervin Ibrahimoviq.

Obradoviq, në maj të vitit të kaluar, ndërsa ushtronte detyrën e të ngarkuarit me punë në Moskë, mori pjesë në forumin “Dialogu Ballkanik 2025: Mali i Zi dhe Rusia” në Shën Petersburg, ku deklaroi se “Rusia dhe Mali i Zi janë dy shtete, një shpirt”, si dhe se “dy popuj janë një zemër”.

Ai theksoi gjithashtu se “rruga e shtruar prej kohësh nuk guxon të humbet”.

Më pas, në publik dolën edhe postimet e tij në rrjetet sociale, përfshirë një fotografi pranë monumentit të Feliks Dzerzhinskit në Lubjankë, themeluesit të policisë sekrete sovjetike Çeka, e cila konsiderohet simbol i përndjekjes politike dhe represionit.

Feliks Dzerzhinski ishte në krye të pararendëses së KGB-së ruse – Çekës. Ai konsiderohet përgjegjës për vdekjen e rreth 250 mijë personave. Çeka ka ekzekutuar pa gjyq dhjetëra dhe qindra mijëra njerëz në bodrumet e burgjeve dhe në vende publike.

Ministria e Punëve të Jashtme e Malit të Zi ishte distancuar që atëherë nga deklaratat e tij, duke theksuar se ato nuk pasqyrojnë politikën zyrtare shtetërore dhe se janë dhënë pa konsultim dhe pa pëlqimin e Ministrisë. Po ashtu ishte bërë e ditur se ishin ndërmarrë hapat përkatës.

E pyetur për arsyet e thirrjes së re për konsultime, Ministria deklaroi shkurt se procedura është zhvilluar në përputhje me Ligjin për Punët e Jashtme, pa dhënë detaje shtesë.

“Deklarata është dhënë pa konsultim dhe pa pëlqimin e Ministrisë së Punëve të Jashtme, për çka, në raport me veprimin në fjalë, janë ndërmarrë hapat përkatës”, kishin deklaruar atëherë nga MPJ.

Në maj të vitit të kaluar, Obradoviq ishte diplomati i vetëm në përfaqësinë në Moskë, për çka përkohësisht ushtronte detyrën e të ngarkuarit me punë. Sipas të dhënave në faqen zyrtare të MPJ-së, këtë pozitë aktualisht e ushtron Mirsad Biboviq, i cili në fund të vitit 2024 u tërhoq nga posti i ambasadorit në Danimarkë dhe Norvegji.

Sipas praktikës diplomatike, thirrja për konsultime zakonisht bëhet për sqarimin e qëndrimeve të caktuara, pas së cilës mund të pasojnë paralajmërime apo edhe largime nga shërbimi.

Rasti rihap çështjen e pranisë dhe ndikimit të kuadrove pro-ruse brenda rrjetit diplomatik të vendeve të rajonit, në një kohë kur Moska synon të ruajë levat politike dhe të sigurisë në Ballkanin Perëndimor.

Në mars të vitit 2022, Moska e përfshiu Malin e Zi në listën e shteteve të huaja që “ndërmarrin veprime armiqësore kundër Rusisë, personave juridikë dhe fizikë rusë”.

Në atë periudhë, Mali i Zi dëboi pesë diplomatë rusë, me arsyetimin se aktivitetet e tyre ishin në kundërshtim me Konventën e Vjenës për Marrëdhëniet Diplomatike. Si kundërmasë, më 24 mars, Rusia shpalli një diplomat të ambasadës malazeze në Moskë person non grata.

The Geopost