Presidentja e Komisionit Evropian: Është thelbësore të mos pranojmë narrativën ruse për Ukrainën, Putini ka dështuar

Presidentja e Komisionit Evropian, Ursula von der Leyen, ka theksuar se është “jashtëzakonisht e rëndësishme që të mos pranojmë narrativën ruse” për pushtimin e Ukrainës nga Moska, duke bërë të qartë se qëllimet strategjike të presidentit rus, Vladimir Putin, kanë dështuar plotësisht.

“Nëse shohim qëllimet strategjike dhe ushtarake të Putinit, ato kanë dështuar plotësisht”, deklaroi Von der Leyen gjatë një fjalimi për mediat ndërkombëtare. Ajo shtoi se Rusia synonte të “rusifikonte” Ukrainën, por vendi ka bërë një përparim të qartë drejt integrimit evropian.

“Ai donte të ndalte NATO-n, por NATO është zgjeruar dhe Ukraina ka mbetur e fortë dhe evropiane”, vijoi zyrtarja evropiane, duke theksuar dështimin e planit të Moskës.

Presidentja e Komisionit Evropian theksoi gjithashtu se lufta në Ukrainë po afrohet drejt katër viteve, pavarësisht se Putini kishte shpresuar ta pushtonte vendin “brenda disa ditësh ose javësh”.

Sipas saj, realiteti i deritanishëm tregon qartazi rezistencën e popullit ukrainas dhe dështimin e strategjive të Kremlinit.

“Është shumë e rëndësishme që ne, nga ana jonë, të tregojmë të vërtetën për atë që po ndodh në Rusi me ekonominë e luftës, me normat e larta të interesit dhe inflacionin, tërësisht të izoluar”, tha Von der Leyen, duke nënvizuar se Europa duhet të ruajë fokusin mbi pasojat ekonomike dhe sociale të politikave të Moskës.

Duke folur për nevojën për të forcuar pozicionin e Bashkimit Evropian, Von der Leyen theksoi se është “jetike të avancojmë negociatat dhe të ushtrojmë presion mbi Putinin”, në mënyrë që të mbrohet integriteti i Ukrainës dhe të ruhet stabiliteti rajonal.

Ndërkohë, udhëheqësit botërorë janë mbledhur në Mynih, ku në agjendë janë lufta në Ukrainë, tensionet me Kinën dhe një marrëveshje e mundshme bërthamore midis Iranit dhe Shteteve të Bashkuara të Amerikës.

Takimi i liderëve ka për qëllim koordinimin e politikave ndërkombëtare për të përballuar këto kriza dhe për të mbështetur vendet që përballen me agresionin e huaj.

Deklaratat e Von der Leyen theksojnë qartësisht mbështetjen e Bashkimit Evropian për Ukrainën dhe dëshirën për të mos lejuar që narrativat e krijuara nga Kremlini të manipulojnë opinionin publik ndërkombëtar.

The Geopost