Beogradi e quajti kërcënim, NATO i përgjigjet Serbisë që u ankua për lidhjen ushtarake Kroaci-Shqipëri-Kosovë

Zëvendëssekretarja e Përgjithshme e NATO, Radmila Shekerinska, ka komentuar reagimet e Serbisë lidhur me marrëveshjen ushtarake ndërmjet Kroacia, Shqipëria dhe Kosova, duke theksuar se dy vendet anëtare të aleancës janë kontribuues të rëndësishëm të paqes dhe stabilitetit në rajon.

Në një intervistë për agjencinë e lajmeve Beta, ajo deklaroi se Shqipëria dhe Kroacia janë aleatë të besueshëm dhe aktivë në kuadër të NATO-s, përfshirë edhe angazhimin e tyre në misionin paqeruajtës KFOR.

“Shqipëria dhe Kroacia nuk janë vetëm aleatë të besueshëm dhe të vlefshëm brenda Aleancës. Ato janë gjithashtu kontribuese të rëndësishme për paqen dhe stabilitetin rajonal. Ato janë të pranishme në KFOR, por në përgjithësi janë shumë të përqendruara në mbështetjen e kësaj agjende në rajon”, ka thënë Shekerinska.

Zyrtarja e lartë e NATO-s theksoi gjithashtu se aleanca nuk është e përfshirë në diskutimet për marrëveshjen në fjalë dhe se anëtarësimi në NATO nuk e pengon një shtet aleat të lidhë marrëveshje të tjera të mbrojtjes me vende të treta.

“Ajo që shohim në përgjithësi është se, sigurisht, situata gjeopolitike globale ka ndikuar edhe në rajon. Ju shikoni më shumë ushtrime, më shumë investime në mbrojtje dhe siguri, por ne gjithmonë u bëjmë thirrje aleatëve dhe partnerëve që të angazhohen edhe në dialogun politik dhe zgjidhjen e çështjeve të mbetura në rajon. Prania jonë në Ballkanin Perëndimor synon të mbështesë këtë lloj dialogu politik”, tha ajo.

Komentet vijnë pasi Serbia reagoi ditë më parë ndaj takimeve dhe bashkëpunimit ushtarak mes Kroacisë, Shqipërisë dhe Kosovës, duke e paraqitur këtë zhvillim si një kërcënim për sigurinë e saj.

The Geopost