Zelensky pranon propozimin e SHBA-së për raund të ri bisedimesh paqeje javën e ardhshme

Presidenti i Ukrainës, Volodymyr Zelensky, ka bërë të ditur se ka pranuar propozimin e Shteteve të Bashkuara të Amerikës për të zhvilluar një raund tjetër bisedimesh me qëllim përfundimin e luftës me Rusinë.

Në një intervistë për Bloomberg, të cituar nga Ukrinform, Zelensky tha se takimi i radhës pritet të mbahet të martën ose të mërkurën e javës së ardhshme. Megjithatë, sipas tij, mbetet ende e paqartë nëse Rusia do të pranojë të marrë pjesë në këto bisedime që pritet të zhvillohen në SHBA.

Në qendër të diskutimeve pritet të jetë një propozim amerikan për krijimin e një zone të lirë ekonomike që do të shërbente si zonë tampon në rajonin lindor të Donetskut. Por presidenti ukrainas theksoi se si Kievi ashtu edhe Moska janë skeptikë ndaj kësaj ideje.

“Asnjëra nga palët nuk është e interesuar për idenë e zonës së lirë ekonomike – as rusët, as ne. Ne kemi pikëpamje të ndryshme për të. Marrëveshja ishte që të kthehemi me një vizion se si mund të duket kjo për takimin e ardhshëm”, tha Zelensky gjatë intervistës telefonike nga Kievi.

Ai nënvizoi se çështja e kontrollit të zonës tampon mbetet thelbësore dhe kërkon qartësi nga ana e SHBA-së. “Nëse është territori ynë – dhe është territori ynë – atëherë vendi, territori i të cilit është, duhet ta qeverisë atë”, u shpreh ai.

Zelensky shtoi gjithashtu se administrata e ish-presidentit Donald Trump dëshiron që dokumentet të nënshkruhen menjëherë, por theksoi se çdo marrëveshje paqeje do të duhet të miratohet në Ukrainë përmes votimit në parlament ose përmes një referendumi kombëtar.

Sa i përket raundit të fundit të bisedimeve, të zhvilluara në Emiratet e Bashkuara Arabe, presidenti ukrainas bëri të ditur se ato janë përqendruar në mekanizmat e armëpushimit dhe në rolin e SHBA-së për monitorimin e tyre.

Megjithatë, sipas tij, negociatorët nuk arritën të finalizojnë detajet pa vendime politike në nivelin më të lartë.

The Geopost