Janjiq: BIA dhe Vuçiq të përfshirë në manipulimin e zgjedhjeve amerikane të 2020-ës

Analisti politik serb, Dushan Janjiq, deklaroi se për manipulimin e zgjedhjeve presidenciale në Shtetet e Bashkuara të Amerikës në vitin 2020 përgjegjëse janë Agjencia e Sigurisë dhe Informacionit e Serbisë (BIA) dhe presidenti serb Aleksandar Vuçiq.

Ai i tha agjencisë Beta se, pas fjalimit të presidentit amerikan Donald Trump dje në Forumin Ekonomik Botëror në Davos, është bërë e qartë se hetimi për manipulimin e zgjedhjeve presidenciale amerikane është duke u zhvilluar dhe se në të përfshihet edhe Beogradi, raporton nova.rs.

“Më parë ka pasur disa paralajmërime për nisjen e hetimeve mbi vjedhjen e zgjedhjeve presidenciale amerikane përmes rrjeteve sociale, si dhe për përdorimin e një adrese IP nga Serbia në një fushatë kundër Trumpit. Kjo deri më tani nuk ishte konfirmuar, por pas fjalimit të presidentit Trump dje në Davos, tani është e qartë se hetimi po zhvillohet dhe përfshin edhe Beogradin”, tha Janjiq.

Sipas tij, në SHBA ekziston një aspekt që, siç u shpreh ai, “politikanët këtu – të shkolluar pjesërisht – dhe ekspertët e BIA-së e kanë injoruar”.

“Në SHBA ekziston Agjencia Kombëtare e Sigurisë, e cila mbikëqyr sigurinë kibernetike, veçanërisht në situata që ndikojnë në interesat dhe demokracinë amerikane. Nëse del të jetë e vërtetë – dhe nuk kemi arsye të dyshojmë se Trump po trillonte – duhet të pritet ndjekja penale e të gjithë atyre që kanë marrë pjesë në manipulimin e zgjedhjeve amerikane”, tha ai.

Janjiq shtoi se nuk përjashton mundësinë që manipulimi të jetë kryer nga BIA përmes ndonjë agjencie private, por të lidhur ngushtë me pushtetin dhe me konceptin e ashtuquajtur të “luftës kundër revolucionit të ngjyrosur”.

Ai theksoi se disa nga personat e përfshirë tashmë po largohen nga maja e BIA-së, por se kjo nuk do t’i shpëtojë ata nga përgjegjësia.

“Ngrihet pyetja se deri ku do të shkojë hetimi dhe nëse do të përfshijë edhe Aleksandar Vuçiqin, i cili kontrollon gjithçka në Serbi. Kjo do të ishte një situatë shumë e vështirë për të, sepse do të tregonte se një shtet ka udhëhequr një veprim kriminal kibernetik kundër një shteti tjetër – në këtë rast, kundër SHBA-së për zgjedhjet presidenciale. Se kush do të ndiqet penalisht, do ta vendosë prokurori amerikan”, tha Janjiq.

Ai komentoi gjithashtu pretendimet se pas manipulimit të zgjedhjeve presidenciale amerikane qëndron kompania serbe “Roaming Networks”, duke i cilësuar këto si “hedhje uji në mullirin e Vuçiqit”.

Sipas tij, në këtë hetim duhet të përfshihet edhe Departamenti për luftën kundër krimit të teknologjisë së lartë i Ministrisë së Brendshme të Serbisë.

“Derisa të provohet se BIA nuk ka një ekip për luftën kundër revolucionit të ngjyrosur – dhe Aleksandar Vulin ka deklaruar se një ekip i tillë ekziston – për pjesëmarrjen operative në manipulimin e zgjedhjeve amerikane përgjegjëse është BIA, ndërsa për përgjegjësinë politike dhe kriminale përgjegjës është Aleksandar Vuçiq”, theksoi Janjiq.

Ndërkohë, presidenti amerikan Donald Trump njoftoi dje në Forumin Ekonomik Botëror në Davos se së shpejti do të nisë ndjekje penale lidhur me, siç i quajti ai, “zgjedhjet e vjedhura” të vitit 2020.

“Shumë shpejt njerëzit do të ndiqen penalisht për atë që kanë bërë. Ishin zgjedhje të manipuluara”, deklaroi Trump.

Në fillim të dhjetorit të vitit të kaluar, Trump e lidhi kompaninë serbe “Dominion Voting Systems” me falsifikimin e zgjedhjeve presidenciale amerikane të vitit 2020. Ai shpërndau gjithashtu në rrjetet sociale një postim ku thuhej se Elon Musk kishte parandaluar manipulimin e zgjedhjeve të vitit 2024 duke çaktivizuar kompjuterët e kësaj kompanie në Serbi.

Trump humbi zgjedhjet presidenciale të vitit 2020 ndaj Joe Biden, por gjatë natës së zgjedhjeve ai pretendonte se demokratët kishin vjedhur votat duke përdorur makina elektronike dhe pajisje optike për numërimin e votave të kompanisë “Dominion Voting Systems” në 28 shtete amerikane.

Kompania Dominion Voting Systems ka selinë në Kanada, me degë për zhvillimin e softuerit në SHBA, Kanada dhe Serbi, dhe është e pranishme në tregun serb që nga viti 2011.

Ueb-faqja amerikane “Stolen Elections Facts” ka publikuar se Dominion ka hapur një qendër të dhënash në Beograd përmes kompanisë serbe “Roaming Networks”, e njohur edhe si “Dot Networks”, e cila operon edhe në Shtetet e Bashkuara të Amerikës.

The Geo Post