Trump: SHBA-ja do ta “drejtojnë” Venezuelën deri në “tranzicion të mençur” pas kapjes së Maduros

Presidenti amerikan Donald Trump deklaroi të shtunën se Shtetet e Bashkuara kanë nisur bashkëpunimin me zëvendëspresidenten e Venezuelës, Delcy Rodríguez, pas kapjes së presidentit Nicolás Maduro në një operacion ushtarak të gjerë të SHBA-së.

I pyetur nga gazetarët nëse është i gatshëm të punojë me Rodríguez, Trump tha se ajo ishte betuar si presidente, por shtoi se ishte “zgjedhur nga Maduro”.

Sipas tij, Sekretari i Shtetit Marco Rubio ka zhvilluar tashmë bisedime me Rodríguez.

“Marco sapo pati një bisedë me të dhe ajo është, në thelb, e gatshme të bëjë atë që ne mendojmë se është e nevojshme për ta bërë Venezuelën përsëri të madhe”, u shpreh Trump.

Ai shtoi se Rodríguez i kishte thënë Rubios: “Do të bëjmë çfarë të duash”, duke theksuar se, sipas tij, “nuk ka realisht zgjidhje tjetër”.

Trump njoftoi se Shtetet e Bashkuara planifikojnë ta “drejtojnë Venezuelën” për një periudhë të pacaktuar dhe të “rindërtojnë infrastrukturën e naftës”, pas kapjes së Maduros.

Ai tha se prania amerikane do të vazhdojë derisa vendi të “rikthehet në rrugën e duhur”, pa dhënë një afat kohor të qartë.

Sipas autoriteteve amerikane, Nicolás Maduro pritet të mbërrijë sot në Nju Jork, ku do të përballet me akuza për trafik droge dhe armësh.

Edhe bashkëshortja e tij, Cilia Flores, është vënë në paraburgim, pasi çifti u arrestua gjatë një bastisjeje nate nga forcat elitare amerikane.

Udhëheqësja e opozitës, María Corina Machado, ka bërë thirrje që të emërohet një kandidat i opozitës për të udhëhequr vendin.

Ndërkohë, ministri i jashtëm venezuelian këmbëngul se Maduro mbetet kreu legjitim i shtetit.

Në kryeqytetin Karakas, reagimet e qytetarëve janë të përziera: disa festojnë atë që e quajnë “ndryshim pozitiv”, ndërsa të tjerë paralajmërojnë se kapja e Maduros mund të thellojë krizën dhe të sjellë “një konflikt edhe më të keq”, raporton CNN./TheGeoPost.