Rusët kërkojnë fundin e luftës dhe zgjidhje për krizën ekonomike

Presidenti rus Vladimir Putin ka nisur të enjten në Moskë emisionin e tij vjetor “Linja e Drejtpërdrejtë”, një format disaorësh gjatë të cilit ai iu përgjigjet pyetjeve të përzgjedhura të qytetarëve, i kombinuar edhe këtë vit me konferencën e tij tradicionale për shtyp të fundvitit.

Ky është edicioni i 22-të i këtij transmetimi që nga hera e parë e mbajtur gjatë mandatit të parë presidencial të Putinit në vitin 2001, ku përveç publikut, pyetje i parashtrojnë edhe gazetarë të akredituar.

Sipas një sondazhi të zhvilluar në nëntor nga Qendra e pavarur Levada, çështja që qytetarët rusë thanë më shpesh se do t’ia ngrinin Putinit ishte përfundimi i “operacionit ushtarak special” – termi i përdorur nga Kremlini për luftën në Ukrainë, e cila po hyn në vitin e katërt.

Rreth 21 për qind e të anketuarve thanë se do ta pyesnin presidentin se kur do të mbaronte lufta, ndërsa shqetësimet ekonomike zinin gjithashtu një vend të rëndësishëm.

Sipas sondazhit, 16 për qind e qytetarëve kërkonin përgjigje për rritjen e pensioneve dhe pagave, ndërsa 8 për qind prisnin që Putin të adresonte inflacionin në rritje.

Në vijim të emisionit, Putin pritet të komentojë zhvillimet kryesore politike, ushtarake dhe ekonomike, në një format që Kremlini e përdor prej vitesh për të përcjellë mesazhet kryesore të pushtetit drejt publikut rus.

Mbi luftën dhe paqen

Duke iu përgjigjur pyetjes së parë që iu bë në lidhje me luftën në vazhdim dhe mundësinë e arritjes së një marrëveshjeje paqeje me Ukrainën, Putin tha se Moska ende nuk e “shihte gatishmërinë e Ukrainës për paqe” dhe vazhdoi të lavdëronte përparimet e Moskës në Ukrainën lindore, përfshirë kapjen e supozuar të qytetit të Kupyansk, në rajonin lindor të Kharkiv, pavarësisht se Presidenti ukrainas Volodymyr Zelensky regjistroi një mesazh video nga qyteti i sulmuar javën e kaluar pas raportimeve për një kundërsulm të suksesshëm ukrainas në zonë.

Rusia, vazhdoi Putin, ishte “e gatshme dhe e vullnetshme për t’i dhënë fund konfliktit me mjete paqësore”, ndërkohë që adresonte “shkaqet rrënjësore” të luftës – një term i përdorur shpesh nga zyrtarët e Kremlinit që nënkupton pranimin e aneksimit nga Rusia të sipërfaqeve të mëdha të Ukrainës lindore.

Mbi marrjen e përgjegjësisë

“Ne nuk e konsiderojmë veten përgjegjës për vdekjet e njerëzve sepse nuk ishim ne ata që e nisëm këtë luftë”, tha Putin në përgjigje të një pyetjeje nga korrespondent i NBC News, Keir Simmons, i cili e pyeti udhëheqësin rus nëse ai do të ishte përgjegjës për vdekjen e ushtarëve ukrainas dhe rusë në vitin 2026 nëse Moska do të refuzonte planin e paqes të Uashingtonit.

Putin shtoi se Rusia kishte rënë dakord me propozimet e Presidentit të SHBA-së Donald Trump gjatë samitit të Alaskës në gusht, pa specifikuar se cilat ishin ato oferta, dhe ishte “e gatshme për kompromis”.

Rusia nuk po “hedh poshtë” asgjë dhe është “e gatshme për negociata dhe për t’i dhënë fund konfliktit me mjete paqësore”, vazhdoi Putin, duke shtuar se vendimi varet nga “kundërshtarët perëndimorë” të Rusisë, përfshirë “krerët e regjimit të Kievit dhe sponsorët e tyre evropianë”./TheGeopost.