Parlamenti Evropian dërgon mision në Serbi, Ceci: Nuk i besojmë më Vuçiqit

Bashkëkryetarja e Partisë së Gjelbër Evropiane, Vula Ceci, ka deklaruar se misioni i ardhshëm i Komitetit të Punëve të Jashtme të Parlamentit Evropian (AFET) në Serbi do të përbëjë një formë të rëndësishme presioni politik dhe solidariteti me qytetarët serbë, si ndaj institucioneve të Bashkimit Evropian ashtu edhe ndaj autoriteteve në Beograd.

Në një deklaratë për televizionin N1, Ceci tha se delegacioni parlamentar, i cili pritet të vizitojë Serbinë në fund të janarit, synon t’i dërgojë një mesazh të qartë Brukselit zyrtar që të mos e trajtojë më Serbinë vetëm si një faktor gjeopolitik, por të marrë parasysh realitetin e qytetarëve dhe, siç u shpreh ajo, “represionin që ekziston në vend”.

Sipas Ceci-t, ky mision buron nga një rezolutë e miratuar nga Parlamenti Evropian në tetor, e cila kërkonte në mënyrë eksplicite dërgimin e një delegacioni në Serbi për të vlerësuar gjendjen në terren, zbatimin e reformave, si dhe për të zhvilluar biseda me qytetarët lidhur me sundimin e ligjit, protestat, shtypjen e demonstruesve dhe lirinë e medias.

“Ne duam që të ketë vetëdije për atë që po ndodh në Serbi dhe duam ndryshime. Këto ndryshime nuk do të vijnë nga Brukseli, por nga vetë Serbia. Në të njëjtën kohë, qytetarët duhet të ndiejnë solidaritet dhe drejtësi. E ardhmja e Serbisë është në Bashkimin Evropian, por në këto kushte ne nuk i besojmë më presidentit Aleksandar Vuçiç, sepse ai ka treguar se po ndjek një drejtim tjetër”, tha Ceci.

Duke iu përgjigjur pyetjes nëse misioni do të ketë karakter procedural apo politik, Ceci theksoi se do të jetë të dyja. Sipas saj, nga këndvështrimi i autoriteteve serbe, ky mision duhet të shihet kryesisht si politik, pasi përfaqësuesit e Parlamentit Evropian do të vlerësojnë drejtpërdrejt situatën në terren, përfshirë çështjet e shtypjes së protestuesve, lirinë e medias dhe trajtimin e të burgosurve politikë.

Ajo shtoi se pret që delegacioni të mos kufizohet vetëm në takime me përfaqësuesit e qeverisë, por të zhvillojë kontakte edhe me qytetarët, shoqërinë civile dhe studentët, duke u përqendruar në zgjedhjet e lira, demokracinë dhe perspektivën evropiane të Serbisë.

Sa i përket hapjes së mundshme të Klasterit 3 në procesin e integrimit evropian, Ceci vlerësoi se një hap i tillë mund të japë shpresë, por paralajmëroi se Bashkimi Evropian nuk duhet të bëjë kompromis me realitetin në terren.

“Nëse hapja e klasterit shërben vetëm për të normalizuar situatën, atëherë kjo është problematike. Ne nuk do të heqim dorë nga monitorimi dhe as nga balanca midis mbajtjes së dyerve të hapura dhe mbylljes së tyre nëse situata nuk përmirësohet. Një vend me brutalitet politik, të burgosur politikë, frikë te qytetarët dhe shtypje të medias nuk mund të bëhet pjesë e Bashkimit Evropian”, përfundoi Ceci./TheGeopost.