Beogradi edhe një hap afër Moskës, Inteligjenca ruse formon Shoqërinë historike ruse në Serbi

Serbia dhe Rusia edhe njëherë kanë vënë në pah lidhjet e tyre të ngushta. Hapi i fundit që ndërmorën është hapja e zyrës përfaqësuese të Shoqërisë Historike Ruse (RIO) në Beograd, degë të së cilës u paralajmërua se do të hapen në shtatë rajone të tjera.

Ky vendim u mor në asamblenë e përgjithshme të RIO-s, raportoi TASS, transmeton The Geopost.

“Propozohet që zyra përfaqësuese e Shoqërisë Historike Ruse të krijohet në qytetin e Beogradit, Republika e Serbisë”, tha Ruslan Gagkuev, kryetar i Bordit të Drejtorëve të RIO-s.

Ndonëse u pyet nëse është dikush kundër kësaj iniciative, pyetja qe retorike.

“Kolegët, a keni ndonjë kundërshtim? Vendimi është marrë”, tha presidenti i RIO-s dhe drejtori i Shërbimit të Inteligjencës së Jashtme të Federatës Ruse, Sergei Naryshkin dhe një bashkëpunëtor i ngushtë i Presidentit rus Vladimir Putin.

Kujtojmë se, Aleksandar Vulin, ish-zëvendëskryeministër i Serbisë dhe ish-kreu i BIA-s, që nga maji kryetar i Bordit Mbikëqyrës të kompanisë publike Srbijagas, takohej shpesh me Naryshkin.

Në shkurt të këtij viti, gjatë një takimi në Moskë, Vulin, siç thuhet në njoftimin për shtyp të kabinetit të Vulinit, e informoi Nirishkinin se në Serbi po zhvillohet një përpjekje për një revolucion me ngjyra dhe destabilizim të Republikës së Serbisë nga shërbimet e inteligjencës perëndimore.

Në të njëjtin njoftim thuhej se, Naryshkin shprehu kënaqësinë e tij për takimin me Vulinin si një “mik të provuar të Rusisë”, ndërsa u theksua se gjoja “Rusia mbështet stabilitetin në Ballkan ”.

Deklarata të tilla vënë në pah sesi Serbia përdorë lidhjet e saj me Rusinë, për interesat e saj, duke u munduar gjithmonë të ketë mbështetjen e saj./The Geopost/