BE do të akuzojë zyrtarisht Rusinë për përdorim të armëve kimike në Ukrainë

Këshilli i Bashkimit Evropian ka përgatitur një rregullore të re sanksionesh në të cilën Rusia akuzohet zyrtarisht për herë të parë për përdorimin e gazit CS si armë lufte në vijat e frontit në Ukrainë.

Në një deklaratë të dhënë për njësinë hetimore ruse Systema të Radios Evropa të Lirë, zyrtarët e BE-së i referohen dy raporteve të Organizatës për Ndalimin e Armëve Kimike (OPCW), të botuara me kërkesë të Ukrainës në nëntor 2024 dhe shkurt 2025.

Ky propozim është pjesë e një pakete sanksionesh me tre pjesë që BE pritet ta miratojë në ditët në vijim. Dy të tjerat synojnë sulmet kibernetike dhe fushatat ruse të destabilizimit në Evropë. Sipas burimeve të brendshme të BE-së, do të pasojë një paketë e katërt sanksionesh, e cila do të përqendrohet në flotën në hije të Rusisë.

Raportet dokumentojnë përdorimin e dyshuar të gazit CS në Maryivka dhe Ilinka në rajonin e Dnipropetrovsk të Ukrainës gjatë sulmeve ruse në vitin 2024.

OPCW i bazon raportet e saj në mostrat e tokës dhe të ujit, intervistat me personelin ushtarak dhe fotografitë e gëzhojave të granatave dore të etiketuara si “RG-Vo”, që do të thotë “granatë dore – agjent toksik”.

Kanali televiziv shtetëror rus RT shfaqi pamje të trupave ruse duke përdorur granata të tilla të prodhuara në Rusi në fushën e betejës.

“Duke pasur parasysh seriozitetin e situatës dhe në mungesë të një shpjegimi të besueshëm nga Rusia në lidhje me përdorimin gjerësisht të raportuar të armëve kimike, dhe me qëllim forcimin e normës globale kundër përdorimit të armëve kimike, Bashkimi Evropian bën thirrje që përdorimi i provuar i armëve kimike të klasifikohet si një metodë lufte nga OPCW në kohën e duhur”, thuhet në memorandum.

Lista e sanksioneve të BE-së përfshin forcën mbrojtëse radiologjike, kimike dhe biologjike të Ministrisë së Mbrojtjes së Rusisë dhe qendrat e 27-ta dhe 33-ta kërkimore shkencore, të cilat janë të përfshira në zhvillimin dhe përdorimin e agjentëve kimikë të luftës.

CS është një gaz lotsjellës i njohur edhe si “jargavan”. Shkakton acarim të rëndë të syve, lëkurës dhe traktit respirator. Kushdo që bie në kontakt me të do të humbasë orientimin dhe mund të mbytet.

Zyrtarisht, CS konsiderohet një mjet jo-vdekjeprurës për kontrollin e trazirave dhe përdoret nga policia në shumë vende. Përdorimi i substancave të tilla si armë është i ndaluar sipas Nenit 1 të Konventës për Armët Kimike, sipas zyrtarëve të BE-së.

Sipas Ministrisë së Mbrojtjes së Ukrainës, kapsula që përmbanin këtë gaz u gjetën gjithashtu në dronët iranianë Shahed, të cilët përdoreshin shpesh nga Rusia në sulmet e saj ndaj Ukrainës./rferl/