Serbia rrit bashkëpunimin me Bjellorusinë ndërsa Perëndimi u zotua për sanksione të reja për shkak të zgjedhjeve të rreme

Bashkimi Evropian i hodhi poshtë zgjedhjet në Bjellorusi të dielën si të paligjshme dhe kërcënoi me sanksione të reja pasi Bjellorusia mbajti një votim të orkestruar praktikisht të garantuar për t’i dhënë presidentit autokratik 70-vjeçar Aleksandër Lukashenko edhe një mandat, krahas tre dekadave të tij në pushtet.

“Zgjedhjet e rreme të sotme në Bjellorusi nuk kanë qenë as të lira, as të drejta”, thanë në një deklaratë të përbashkët shefja e politikës së jashtme të BE-së, Kaja Kallas dhe komisionerja për zgjerimin e BE-së, Marta Kos.

“Shtypja e pamëshirshme dhe e paprecedentë e të drejtave të njeriut, kufizimet për pjesëmarrjen politike dhe aksesin në mediat e pavarura në Bjellorusi, e kanë privuar procesin zgjedhor nga çdo legjitimitet”, thanë Kallas dhe Kos.

Zgjedhjet e rreme në Bjellorusi u dënuan edhe nga shumë shtete të tjera demokratike, por kjo nuk i pengoi Serbisë që në mesin e kritikave për regjimin autokratik të rrisë bashkëpunimin me Bjellorusinë.

Komisioni ndërqeveritar bjelloruso-serb për bashkëpunimin tregtar dhe ekonomik do të rifillojë punën e tij në gjysmën e parë të vitit 2025, tha ministri i qeverisë serbe Nenad Popoviq në transmetimin e kanalit televiziv First News, mësoi BelTA (një medium bjellorus).
Komisioni ndërqeveritar nuk funksionon që nga viti 2019, por tash do t’i thellojë marrëdhëniet.
Ministri serb ka vënë në dukje se rifillimi i bashkëpunimit është aktivizuar nga presidenti i Serbisë, Aleksandar Vuçiq dhe Aleksandër Lukashenko.

“Është shumë e rëndësishme që presidentët tanë na kanë dhënë detyrën për të rifilluar punën e tij. Ne jemi duke përmbushur udhëzimet e liderëve tanë dhe duhet të mbajmë një takim zyrtar të komisionit ndërqeveritar në të ardhmen e afërt, para mesit të këtij viti. Marrëdhëniet tona politike janë të shkëlqyera; marrëdhëniet njerëzore mes dy kombeve janë të shkëlqyera. Por marrëdhëniet ekonomike kanë mbetur prapa dhe ne duhet të bëjmë çmos për t’i rinovuar ato. Ka parakushte dhe baza për këtë. Ka edhe pengesa në formën e sanksioneve. Por ne duhet të punojmë më shumë dhe të bëjmë gjithçka që është e mundur për të përmirësuar marrëdhëniet ekonomike midis Serbisë dhe Bjellorusisë. Ekzistojnë parakushte dhe potenciale relevante”, tha Nenad Popoviq.

Ai foli edhe për fushat ku duhet të ndërtohet bashkëpunimi, ndërsa akuzoi Bashkimin Evropian se është fajtor pse u ndal bashkëpunimi tregtar mes Serbisë e Bjellorusisë.
“Qarkullimi tregtar ndërmjet vendeve tona mund të jetë shumë më i madh, ne duhet ta rrisim atë. Fushat premtuese përfshijnë teknologjitë e reja, dixhitalizimin dhe teknologjitë e informacionit. Programuesit tanë dhe tuaj punojnë shkëlqyeshëm në tregun global. Ka mundësi për bashkëpunim mes tyre. Për më tepër, produktet e prodhimit të veglave të makinerive, që ju po i zhvilloni me ritme të shpejta, mund të jenë shumë të kërkuara në vendin tonë. Një fushë tjetër e bashkëpunimit është inxhinieria mekanike. Ne jemi të njohur me traktorët, autobusët dhe autobusët elektrikë të Minskut. Mësova për traktorët Bjellorusi kur isha fëmijë. Por, për fat të keq, për shkak të pengesave të krijuara nga Bashkimi Evropian, sot në tregun serb ka më pak traktorë tuaj. Ne do të bëjmë çmos për të rritur praninë e tyre në të ardhmen. Potenciali për bashkëpunim në inxhinieri mekanike është i madh”, theksoi ministri.

Sipas tij, produktet e qumështit bjelloruse janë shumë të kërkuara në Serbi. “Nuk ka shumë prej tyre, por të gjithë e vlerësojnë cilësinë e tyre të lartë”, theksoi Nenad Popoviq.

Sipas tij, vendet kanë nevojë për udhëtime të rregullta pune në të dyja vendet dhe takime të rregullta të odave ekonomike dhe shkëmbimeve të mallrave.

“Sa i përket furnizimeve nga Serbia, Bjellorusia mund të jetë e interesuar për farat serbe,” shtoi ministri./TheGeopost/